Federata Shqiptare e Alpinizmit është bërë tashmë anëtare e Federatës Botërore të Alpinizmit, ndërsa një gjë e tillë ka ndodhur fundjavën e kaluar. Sepse nga 12 deri më 16 tetor në Bresanone të Italisë është zhvilluar Asambleja e përgjithshme e Federatës Botërore të Alpinizmit.

Shqipëria në këtë asamble është përfaqësuar nga Presidenti i Federatës Shqiptare të Alpinizmit, Jani Ziso, si dhe anëtari i Komitetit Drejtues, Fisnik Muça. Në fakt, sipas informacionit që ka dhënë Sekretari i Përgjithshëm i Federatës Shqiptare të Alpinizmit, Ilirjan Çule, hapi i parë për pranimin e Shqipërisë në Federatën Botërore ka qenë mbledhja e Unionit Ballkanik në Serbi.

Sepse në të ka qenë i pranishëm dhe presidenti i Federatës Botërore të Alpinizmit, Fritc Vrijland. Ndërkohë bashkë me Shqipërisë janë pranuar dhe disa anëtarë të tjerë, kurse presidenti i Federatës Shqiptare të Alpinizmit, Jani Ziso, ka bërë dhe prezantim të shkurtër me video të Alpeve Shqiptare.

Gjatë punimeve të Asamblesë së Federatës Botërore të Alpinizmit janë zhvilluar dhe zgjedhjet, ndërsa është konfirmuar presidenti holandezi Fritc Vrijland. Por për delegacionin shqiptar ka qenë i paharrueshëm takimi me Reinhold Mesnerin, që u zgjodh anëtar nderi i Federatës Botërore të Alpinizmit.

Ai është njëkohësisht i pari alpinist që ka ngjitur të 14 majat të Himalajave. Në fund është miratuar që Asambleja e Federatës Botërore të Alpinizmit për 2017-ën të bëhet në Teheran, kurs kështu Shqipëria do të ketë dhe më shumë mundësi për të promovuar turizmin e saj malor.