Federata Shqiptare e Alpinizmit me në krye presidentin e saj, Jani Ziso, fundjavën e kaluar ka qenë e pranishme në mbledhjen e Unionit Ballkanik, që u mbajt në Beograd nga data 27, deri më 29 maj 2016. Në këtë takim, sipas informacionit që ka përcjellë për mediat Sekretari i Përgjithshëm i Federatës Shqiptare të Alpinizmit, Ilirjan Çule, kanë qenë edhe përfaqësuesit e Serbisë, Bosnje-Hercegovinës, Bullgarisë, Kroacisë, Maqedonisë, Greqisë, Malit të Zi, Sllovenisë dhe Turqisë.
Po kështu ka qenë i pranishëm dhe presidenti i Federatës Botërore të Alpinizmit, Fritz Vrijland, sikurse kanë qenë edhe presidenti i Federatës së Alpinizmit të Republikës Çekisë, Jan Bludek, dhe ai i Klubit Alpin të Italisë, Umberto Martini. Nga Vrijland është kërkuar themelimi i Federatës Evropiane të Alpinizmit, ndërsa nga pala shqiptare anëtarësimi i saj në Federatën Botërore të Alpinizmit dhe Turizmit Malor. Janë analizuar të gjitha veprimtaritë, duke nisur që nga ngjitja në Kilimanxharo, apo ngjitjet shkëmbore, orientimet e ringut malor, teknikat e ngjitjes në akull.
Jo vetëm kaq, por është folur edhe mbi zhvillimin e seminareve kualifikuese për udhëheqësit dhe për ngjitjen e radhës në Malin e Bardhë në Francë, apo dhe në Kacka të Turqisë. Takimi është përshëndetur nga të gjithë, ndërsa i radhës më 2017-ën do të bëhet në Malin e Zi. E Shqipëria shpreson të jetë pjesë e Federatës Botërore, kurse kjo e fundit shpreson në krijimin e Federatës Evropiane të Alpinizmit pa bërë përplasje me atë të ecjes.
