ASNN – Për 10 ditë me radhë, Vlora do të jetë “mikpritëse” e një veprimtarie shumë të rëndësishme sportive. Bëhet fjalë për Botërorin e Aeronautikës, edicionion e 9-të, i cili, nga data 5, deri më 14 maj do të zhvillohet në qytetin bregdetar. Është zgjedhur Vlora, për vetë natyrën që ofron, kushtet atmosferike, të cilat ndikojnë shumë në fluturimet me parashutë. Në këtë Botëror marrin pjesë rreth 150 pilotë nga 28 vende të ndryshme të botës.
Kampioni i Shqipërisë në fluturimet e lira me precizion, Xhonatan Islami e cilëson shumë të rëndësishme pjesëmarrjen në këtë veprimtari madhore. “Janë 28 shtete nga e gjithë bota dhe ky është një numër rekord dhe fatmirësisht janë disa shtete të reja që marrin pjesë për herë të parë në një botëror dhe që marrin pjesë në Shqipëri, – thotë ai. – Është Kolumbia që nuk kishte marrë pjesë më përpara në një garë precizioni. Këto ditë në fakt, dhe jo pa arsye, ekipet nuk kanë pritur ditën e fundit për të ardhur.”
“Por kanë ardhur 4 ditë përpara, sepse siç e shikoni këtu ku është shënjestra tani, këtu do të jetë edhe ditët e garës prandaj gjithë djemtë edhe ekipit shqiptar edhe ekipet e huaja po bëjnë stërvitje ditë për ditë që të jenë sa më të ambientuar” – shtoi Xhonatan Islami. Në aeroportin e Rinasit ka mbërritur edhe zëvendëspresidenti i Federatës Sllovene të Aeronautikës, i cili ka thënë përshtypjet e veta për veprimtarinë. Ai tha se “nuk i njoh pilotët shqiptarë, por ata kinezë i njoh mjaft mirë”.
“E di që janë konkurrentë shumë të fortë”, – ka vijuar zyrtari slloven, i cili ka lëshuar edhe sfidën. – Mendoj që Sllovenia do të arrijë të dalë “kampione” pasi ka në përbërje pilotë të fortë, të cilët kanë marrë tituj në veprimtari të tjera.” Botërori i 9-të i Aeronautikës në disiplinën e precizionit do të nisë të premten në 5 maj dhe do të transmetohet drejtpërdrejt nga Rrjeti i Radio-Televizionit Shqiptar.
