ASNN – Francezi i talentuar refuzon Liverpulin dhe Totenhemin, në “Nou Kamp” në qershor. Adrien Rabiot dhe Paris SG-në janë divorcuar. 23-vjeçari tashmë ka ndarë mendjen për t’u ndarë me Paris SG-në, me të cilën skuadër ka kontratë deri në qershor të këtij viti. Midis skuadrave që interesoheshin edhe Liverpuli dhe Totenhemin. Por, “Lë Parizien” shkruan se Rabioti ka vendosur të refuzojë këto dy skuadra, për të kaluar në “Kamp Nou” tek Barcelona.
Me fanellën e skuadrës së parë të PSG-së, Adrien Rabiot, ka zhvilluar 150 ndeshje, duke shënuar edhe 13 gola. Në fakt, pati ekzistuar edhe një hipotezë se Mesut Ëzilli dhe Adrien Rabiot do të shkëmbeheshin me njëri-tjetrin. Ëzilli nuk është duke kaluar momentet më të mira në Londër pasi nuk është i preferuari i trajnerit Unai Emeri, kurse Rabioti është në vitin e fundit të kontratës së tij me Paris SG-në, dhe pritej që të largohej.
Në fakt, mediat spanjolle patën raportuar në fillim të vitit se Paris SG-ja po mendonte ta shiste që në janar mesfushorin francez 15 milionë euro, duke synuar të përfitojë sadopak nga shitja e Rabiotit, pasi në të kundërtën, mesfushori do të largohet në verë pa dëmshpërblim. Por kjo nuk u materializua dhe zyrtarët e Barcelonës synojnë të takohen së shpejti me ata të Paris SG-së, për të finalizuar transferimin.
