ASNN – Në Shqipëri ndalet basketbolli dhe volejbolli, në Kosovë hapet drita jeshile për publikun në sport. 23 qershori ishte një ditë e trishtuar për sportin shqiptar. Dy prej disiplinave më popullore të lojërave me dorë dhe, njëkohësisht, dy prej sporteve më popullore në vend pas futbollit, basketbolli dhe volejbolli, u detyruan ta mbyllnin zyrtarisht sezonin e lënë pezull që pas mesit të marsit, për shkak të epidemisë së koronavirusit.
Ndonëse ishte shpresuar deri në fund për një dritë jeshile nga ana autoriteteve, një gjë e tillë nuk erdhi dhe volejbolli u detyrua të respektonte vendimin e marrë në Asamblenë e 12 qershorit, ku me shumicë votash, u ra dakord që sezoni të mbyllej pa shpallur “kampionë”. Ndërkohë, edhe pse nuk është shpallur ende zyrtarisht, edhe basketbolli e ka mbyllur sezonin, gjithashtu duke mos shpallur “kampionë”. Me pak fjalë, sporti ka kapitulluar dhe ky kapitullim vjen në kontrast të plotë me atë që po ndodh në anën tjetër të kufirit shqiptar.
Në të njëjtën ditë që lojërat me dorë mbyllën sezonin në Shqipëri, Qeveria e Kosovës ka shfuqizuar vendimin që detyronte zhvillimin e veprimtarive sportive pa praninë e publikut. Të martën në mbrëmje, Ekzekutivi e ka votuar propozimin e Ministrit të Shëndetësisë, Armend Zemaj, i cili do të hyjë në fuqi, që nga 28 qershori 2020. Sipas Zemajt, ky vendim ka ardhur pas rekomandimeve që ka marrë nga Instituti Kombëtar i Shëndetësisë Publike.
Duhet theksuar se, ndryshe nga Shqipëria, ku po luhet vetëm futboll, Superliga e Kosovës në futboll, hendboll dhe volejboll, janë sportet e vetme kolektive që kanë rinisur veprimtaritë, për t’i mbyllur sezonet. Që nga lejimi i veprimtarive sportive, ndeshjet janë luajtur pa praninë e shikuesve, kurse nga e diela e 28 qershorit, nuk do nuk do të ketë më ndalesa nga organet shtetërore dhe u mbetet federatave përkatëse që të vendosin lidhur më këtë çështje, duke respektuar protokollet shëndetësore.
