ASNN – Sot luhen ndeshjet e para të gjysmëfinaleve të veprimtarisë së dytë të futbollit në vend, Kupës së Shqipërisë.
Sipas asaj që ka paracaktuar shorti, Laçi do të presë Skënderbeun, ndërsa Flamurtari luan me Kukësin. Të dy takimet fillojnë në orën 16:00.
Kjo veprimtari është e rëndësishme, sepse ajo e kualifikon fituesin në veprimtarinë e dytë të klubeve të kontinentit, Ligën e Evropës.
Në këtë moment të turneut, përsëritet finalja e vitit 2014, ku Flamurtari pati mundur 1-0 Kukësin.
Nga skuadrat që janë ende në garë, nuk e kanë fituar më parë Kupën e Shqipërisë as Skënderbeu dhe as Kukësi. Ndeshjet e kthimit do të luhen më 20 prill 2016.
