ASNN – Nis sot Kupa e Shqipërisë me ndeshjet çerekfinale të saj. Laçi-Partizani dhe Teuta-Kukësi janë takimet e dy çifteve të para, që do të luhen sot përkatësisht në orën 14:00 dhe 17:00.
Të dyja sfidat duken tepër të vështira pasi luajnë skuadrat që kryesojnë edhe renditjen e klasifikimit në Kategorinë Superiore. Partizani ka kryer një merkato të fuqishme teksa është fuqizuar me mjaft lojtarë cilësorë.
Duket se drejtuesit e klubit të kuq kanë synime për të fituar jo vetëm kampionatin por edhe Kupën e Shqipërisë. Takimi Laçi-Partizani do të sillet për sportdashësit drejtpërdrejt nga Rrjeti i Radio-Televizionit Shqiptar.
Ndërkohë, edhe sfida në Durrës pritet të jetë tepër e barazpeshuar, pasi të dy ekipet kërkojnë një vend në Kupat e Evropës, gjë që mund t’ua mundësojë shumë mirë fitimi i Kupës së Shqipërisë.
Ndeshjet e para të dy çifteve të tjera çerekfinale luhen të dielën dhe, duke nisur nga ora 14:00, Vllaznia pret në Shkodër Skënderbeun, ndërsa duke nisur nga ora 17:00 luhet në Vlorë përballja Flamurtari-Tirana.
Ndeshjet e kthimit të çerekfinaleve të Kupës së Shqipërisë luhen pas 3 javësh, më 17 shkurt 2016.
