ASNN – Kategoria e Parë e Kampionatit Kombëtar të Futbollit ul sot siparin e javës së saj të 16-të, me ndeshjen e fundit të grupit A, apo grupit të Veriut, atë midis Kamzës dhe Besëlidhjes.
Rrjeti i Radio-Televizionit Shqiptar do të sjellë për sportdashësit drejtpërdrejt dhe ekskluzivisht këtë takim, që vë përballë njëra-tjetrën kryesuesen e renditjes me ndjekësen e e saj më të afërt.
Kamza kryeson në kuotën e 42 pikëve, pas 14 fitoreve dhe vetëm një humbjeje në 15 ndeshjet e para, ndërsa Besëlidhja është e dyta, por plot 10 pikë prapa, pas 9 fitoreve, 5 barazimeve dhe një humbjeje.
Takimi që luhet sot, duke nisur nga ora 14:00, është ndeshja e dytë këtë sezon midis Kamzës dhe Besëlidhjes, pasi ndeshja e parë, e luajtur vjet në Lezhë, u fitua nga miqtë me rezultatin 3-1.
