ASNN – Do të luhen sot në mesditë ndeshjet çerekfinale të Kupës së Shqipërisë në futboll. 4 çiftet çerekfinaliste, Partizani-Laçi, Flamurtari-Skënderbeu të grupit A dhe Tirana-Apolonia e Vllaznia-Kukësi të grupit B, do të përballen në ndeshjet e para të vlefshme për gjysmëfinalet e Kupës së Shqipërisë.
Sfidat janë të forta pasi janë kualifikuar deri në këtë fazë skuadrat më të mira të kampionatit, duke përjashtuar në njëfarë mënyre Apoloninë. Ndeshjet do të nisin në orën 14, ndërsa vetëm Flamurtari-Skënderbeu do të luhet në orën 17.
Meqenëse dy stadiumet e kryeqytetit, “Qemal Stafa” e “Selman Stërmasi” ende nuk janë gati për të pritur zhvillimin e ndeshjeve, Partizani sfidën ndaj Laçit do ta luajë në Fushë Krujë, ndërsa Tirana-Apolonia do të luhet në stadiumin e qytetit të Krujës.
