ASNN – Kategoria Superiore e Kampionatit Kombëtar të Futbollit do të luajë sot dy ndeshjet e para të javës së saj të katërt. Teuta-Tërbuni, që do të luhet në Stadiumin “Niko Dovana”, do të jetë e para në orën 16:00, ndeshje kjo që do të sillet për sportdashësit drejtpërdrejt nga Rrjeti i Radio-Televizionit Shqiptar.
Por e rëndësishme paraqitet sfida Partizani-Kukësi, që janë edhe dy ekipet që duan të rivalizojnë Skënderbeun për titullin “kampion”. Ndeshja do të luhet në Stadiumin Kombëtar “Qemal Stafa” në kryeqytet, aty ku Kukësi nuk e ka mundur asnjëherë Partizanin.
Diferenca mes tyre është vetëm 1 pikë me ekipin kryeqytetas që ndodhet në vendin e dytë. Java e katërt do të luajë takimet e tjera të dielën dhe të hënën. Ndeshja përmbyllëse do të jetë ajo mes Skënderbeut dhe Tiranës, që do të luhet të hënën në mbrëmje në Korçë.
