ASNN – Kategoria Superiore e Kampionatit Kombëtar të Futbollit luan sot dy ndeshjet e para të javës së saj të 29-të, që nisin të dyja në ora 16:00. Në Pukë, Tërbuni pret Bylisin në duelin e fundtabelës së renditjes, ndërsa në Shkodër, në Fushën Sportive “Reshit Rusi”, Vllaznia përballet me Teutën.
Kjo ndeshje do të sillet për sportdashësit drejtpërdrejt nga Rrjeti i Radio-Televizionit Shqiptar. Vllaznia mban vendin e 6-të të renditjes, me 29 pikë dhe ende është në rrezik përsa i përket mbijetesës në Superiore, kur kanë mbetur edhe 7 javë deri në përfundim të sezonit.
Ndërsa Teuta mban vendin e 4-t, me 45 pikë dhe është përfshirë në një betejë treshe me Kukësin dhe Tiranën, për një vend në Kupat e Evropës sezonin e ardhshëm. 3 ndeshjet e tjera luhen të dielën dhe duke nisur nga ora 16:00, Kukësi pret në fushën e vet Skënderbeun.
Ndërsa duke nisur nga ora 19:00, Laçi viziton kryeqytetin, për t’u ndeshur me Tiranën, kurse Partizani është mysafir në Vlorë, për t’u përballur me Flamurtarin vendas.
