ASNN – Kategoria Superiore e Kampionatit Kombëtar të Futbollit luan të shtunën pasdreke, duke nisur nga ora 13:00, dy ndeshjet e para të javës së saj të 15-të dhe Skënderbeu pret në Korçë Teutën. Vendasit e drejtuar nga Mirel Josa vijnë në këtë takim pas humbjes 1 javë më parë ndaj Kukësit dhe sot do të kërkojnë kthesën e menjëhershme. Por Skënderbeu vjen në këtë takim dy mungesa mjaft të rëndësishme si ajo e kapitenit, Bledi Shkëmbi dhe Gerhard Progni.

Nga ana tjetër, skuadra e Teutës drejtuar tashmë nga trajneri i ri Gentjan Begeja do të kërkojë sot të marrë një rezultat pozitiv ndaj Skënderbeut, të cilin e mposhti në fazën e parë në “Niko Dovana”. Edhe Teuta duhet të bëjë pa shërbimet e dy mesfushorëve, Hodo dhe Koreshit. Pjesa tjetër e skuadrës do të jetë në gatishmëri të plotë të trajnerit Begeja, i cili kërkon fitoren e tij të parë në krye të pankinës durrsake. Ndërkaq, në Kukës, vendasit e drejtuar nga trajneri Artim Shaqiri presin sot Apoloninë.

Verilindorët kërkojnë fitoren në këtë takim pasi shpresojnë te vendi i parë, duke parë që Tirana dhe Partizani përplasen këtë javë me njëra-tjetrën. Ndërkohë, dhe pse në një pozicion të vështirë, Apolonia nuk është dorëzuar. Sot drejt Kukësit skuadra fierake shkon pa tre titullarë, pasi sulmuesi Canka ka plotësuar numrin e kartonëve të verdhë, ndërsa mesfushorët Gërxho e Erkoçeviç janë të dëmtuar.

Megjithatë, trajneri Marjol Miho në debutimin e tij në pankinën fierake beson se Apolonia nuk do të dalë pa pikë nga stadiumi “Zeqir Ymeri”. Dy takime e tjera të javës së 15-të, Laçi-Flamurtari dhe Elbasani-Vllaznia, luhen të dielën, duke nisur nga ora 13:00. Kjo javë mbyllet të hënën me derbin midis Partizanit dhe Tiranës, që do të luhet duke nisur nga ora 18:00 dhe do të sillet për sportdashësit drejtpërdrejt nga Rrjeti i Radio-Televizionit Shqiptar.

Kategoria Superiore

Java e 15-të

Të shtunën:

Skënderbeu – Teuta             (13:00)

Kukësi – Apolonia                (13:00)

Të dielën:

Elbasani – Vllaznia              (13:00)

Laçi – Flamurtari                   (13:00)

Të hënën:

Partizani – Tirana                  (18:00)

Renditja

Nr.       Skuadra         N.        F.         B.        H.        Gsh-Gp          Pikë

1. Partizani 14        9          3          2          13-5                30
2. Tirana 14        8          5          1          18-7                29
3. Kukesi 14        9          1          4          16-10              28
4. Skënderbeu 14        8          3          3          21-5                27
5. Laçi 14        5          5          4          15-10              20
6. Flamurtari 14        4          6          4          12-9                15
7. Vllaznia 14        5          2          7          10-15              14
8. Teuta 14        4          1          9          11-16              13
9. Apolonia 14        2          2          10        4-26              8
10. Elbasani 14        2          0          12        8-25              6