ASNN – Shtyrja e kampionatit ka lënë hapësirë që edhe Sopoti të ketë kohën e duhur për t’u stërvitur. Tashmë çdo gjë është kthyer në normalitet në kampin librazhdas dhe pritet vetëm sfida e parë e ora se kur do të ndeshen me Butrintin. Fillimi i kampionatit është shtyrë dhe gjithçka në skuadër do të ketë avancuar akoma më shumë deri atë ditë.
Puna intensive e bërë nga trajneri Gentian Stojku duket se po jep frutet e saj të para, por ai shprehet se gjithçka do të vërtetohet në paraqitjen që do të bëjmë në ndeshjen e parë. Zërat për afrime të reja duket se janë shuar, ndërsa tashmë pritet vetëm seleksionimi i skuadrës dhe mbajtja e lojtarëve të cilët i nevojiten trajnerit, pasi në ekip ka akoma shumë futbollistë në provë.
Ky fakt paralajmëron se do të ketë largime të tjera nga Sopoti dhe se skuadrat e tjera do t’i kenë sytë nga këta lojtarë për të marrë të duhurin. Stojku duket se e ka të qartë se cilët do të jenë 22 lojtarët tek të cilët do të bazohet, pasi në miqësoret e luajtura, përveç lojtarëve në provë, janë aktivizuar gjithmonë të besuarit e trajnerit dhe që akoma janë pjesë e ekipit, teksa asnjë prej tyre nuk është larguar.
Filozofia që po provon të shfaqë Sopoti është e krijimit të një grupi kompakt që të ketë ecuri në rezultate pozitive. Që do të thotë se pas një fitoreje nuk ka pse t’i mbulojë euforia e më pas në ndeshjen e radhës të zhgënjejnë. Trajneri Stojku shprehet se nga ekipi kërkohet përqendrim dhe të japin më të mirën në pozicionet e vendosura në fushën e lojës.
“Në miqësoret e luajtura deri tani kemi bërë mjaft mirë, edhe pse rezultatet nuk kanë qenë gjithmonë në favorin tonë, – ka deklaruar ai. – Fytyrën e vërtetë ekipi do ta tregojë në kampionat, atje ku vërtet duhet të japim maksimumin për të siguruar rezultate pozitive. Kam punuar mjaft me repartin e mesfushës, pasi nga aty duhet të nisë gjithçka.’
“Nëse ata nuk luajnë mirë e nuk krijojnë hapësira e aksione nga të cilët mund edhe të shënojmë, atëherë nuk mund t’i ngelet përgjegjësia sulmit. Pasi këta të fundit duhet të furnizihen me topa që të arrijnë të shënojnë. Sa i përket mbrojtjes kemi dhënë prova që janë në formë shumë të mirë, ndërsa reparti i sulmit sa vjen e përmirësohet. Por siç e përmenda dhe më sipër duhet të ketë një kombinim perfekt mes mesfushës dhe sulmit”, ka përfunduar Stojku.
