ASNN – Kombëtarja kuqezi do të zbresë sonte në fushën e blertë të Stadiumit të rinovuar, “Elbasan Arena” të Elbasanit, për t’u përballur me Danimarkën në takimin e vlefshëm për grupin “I” të Eliminatoreve të Evropianit 2016. Gjithçka do të vijë drejtpërdrejt dhe ekskluzivisht në Rrjetin e Radio-Televizionit Shqiptar, duke nisur që në orën 19:30 me transmetimin e emisionit “Ëndërr kuqezi”, me bisedë në studio, analiza, lidhje direkte dhe intervista nga stadiumi, si përpara, ashtu edhe në pushim dhe në përfundim të ndeshjes që do të luhet duke nisur nga ora 20:45.
Duke marrë zemër nga një fitore historike muajin e shkuar në Portugali, në një stadium të rindërtuar praktikisht nga e para dhe që përmbush kriteret e UEFA-s dhe vetëm pak ditë para një përballjeje historike me Serbinë, Shqipëria do të ndeshet sonte me Danimarkën, duke synuar t’i japë zjarr ëndrrës kuqezi të kualifikimit për herë të parë në një veprimtari madhore. Trajneri i kombëtares shqiptare, Xhovani De Biazi, pritet që përballë Danimarkës të bëjë pak ndryshime në formacion, ndërkohë që taktika do të jetë pothuajse e njëjtë me atë që ndoqi në fitoren me Portugalinë.
Porta do t’i besohet si gjithnjë Etrit Berishës, i cili është portieri shqiptar më në formë për momentin. Edhe lojtarët e mbrojtjes do të jetë ata që ndaluan portugezët me 7 shtator, e më konkretisht Hysaj, Mavraj, Cana dhe Agolli. Reparti i mesfushës do të jetë dhe reparti më i mbipopulluar pasi trajneri italian do të kërkojë të thyejë pikërisht këtu çdo aksion që kërkojnë të nisin danezët. Në mesfushë do të jenë Lenjani, Kukeli, Xhaka, Abrashi dhe në vend të Odise Roshit pritet të jetë Andi Lila. E vetmja dilemë që ka De Biazi është se cili do të luajë i vetëm në sulm midis Balës dhe Cikalleshit.
