ASNN – Në kampin e Skënderbeut, edhe një ditë pas hedhjes së shortit ka optimizëm për kalimin e Dinamos së Zagrebit dhe futjes së korçarëve në grupet e Ligës së Kampioneve. Kapiteni i Skënderbeut, Bledi Shkëmbi, do të pohonte me këmbëngulje të madhe, që pesë herë kampionët e Shqipërisë do t’i befasojnë kroatët.

“Në këtë fazë që është Liga e Kampioneve ishte e qartë se kundërshtarët do të ishin të fortë e të vështirë, – ka pohuar ai. – Që do të thotë se nuk ka asnjë dallim mes atyre pesë kundërshtarëve që ishin në vazo. Ndaj ne nuk kishim se prisnim ndonjë fat më të mirë nga ajo që do të dilte nga gogla.”

“Dinamo e Zagrebit është një ekip me tradita në futbollin evropian, – ka vijuar kapiteni korçar. – Është një klub që çdo vit zbulon talente dhe në nivel qëndrojnë më lart se sa Skënderbeu. Por ne nuk do të hymë kurrsesi në fushën e lojës me idenë për t’u eliminuar.”

“Do të vazhdojmë në këto dy takime me kokën lart dhe do të përpiqemi të bëjmë surprizën. Presioni më i madh do të jetë mbi kroatët, ndërsa ne do të përpiqemi t’i eliminojmë”, – ka përfunduar kapiteni i Skënderbeut, Bledi Shkëmbi, duke iu referuar dy sfidave të “play-off”-it.