ASNN – Pas një dominimi të Kukësit në fazën e parë të merkatos, tashmë qendra e transferimeve ka lëvizur drejt juglindjes, në Korçë, ku Skënderbeu po bën përpjekje të lërë pas krizën e të marrë lojtarë që bëjnë diferencë. Trajneri Orges Shehi ka hartuar një listë me lojtarët e dëshiruar dhe klubi ka nisur të lëvizë. Por vëmendja e drejtuesve të skuadrës korçare është tek lojtarët që luajnë me ekipet kombëtare të moshave.
Dhe nuk ka nevojë për koment, sepse tregu i Skënderbeut është në zonat shqiptare në rajon, kryesisht në Kosovë. Lojtari i fundit i piketuar për Skënderbeun është pikërisht një futbollist i ekipit përfaqësues të Nën-21-vjeçarëve, Shqipërim Taipi, i cili së fundmi ka luajtur në Tetovë me Shkëndijën. Në fakt, Taipi ka lindur në zonën shqiptare në jug të Serbisë, por ka një karrierë të spikatur për moshën e tij.
Sepse ka luajtur tek Tërnova, Prishtina dhe në fund Shkëndija. Tani ai kërkon një përvojë të re dhe me Skënderbeun do të synojë titullin e këtij edicioni. Roli i tij është mesfushor, por lojtari 21-vjeçar ka tipare të shprehura sulmuese dhe këtë rol e dëshiron mjaft trajneri Shehi. Ardhja e Shqipërim Taipit vjen pas lëvizjes së parë në të njëjtin “treg” të Skënderbeut, pasi mori pak ditë më parë Elmir Asanin.
