Me titullin e 5-të kampion që ka marrë tashmë rrugë, te Skënderbeu kanë nisur të mendojnë për të ardhmen në sezonin e ri dhe në vazhdimësi. Sigurisht, synimi mbetet i madh, ashtu siç pritet të jenë edhe fitimet për kampionët këtë sezon. Përveçse kanë arritur rekordin prej 5 titujsh radhazi, korçarët pritet të vendosin rekordin edhe përsa i përket përfitimeve financiare brenda një sezoni, nisur kjo nga paratë që vijnë nga fitimi i titullit, e drejta televizive dhe të ardhurat e UEFA-s për pjesëmarrjen në Ligën e Kampioneve.
Kjo e fundit mund të jetë një ndihmë e madhe për Skënderbeun, duke parë që formati i shpërblimeve nga qeveria evropiane e futbollit ka ndryshuar për sezonin e ri. Janë miliona lekë që pritet të shkojnë në arkat e skuadrës korçare dhe mund të rrisin pretendimet e saj për të qenë vazhdimisht një pretendente për titull në Shqipëri, pasi me përfitimet e shumta financiare mund të realizohen blerje serioze e të fuqishme në merkato. Bëhet fjalë për përfitime që për korçarët mund të kapin shifrën e afro 500 mijë eurove.
Me fitimin e titullit “kampion”, Skënderbeu pritet të marrë nga arkat e FSHF 100 milionë lekë të vjetra, të cilave do t’i shtohen edhe 60 milion të tjera nga e drejta televizive. Por ajo që pritet të mbushë arkat e klubit është pjesëmarrja në Ligën e Kampioneve, pasi UEFA ka bërë të ditur shumën prej 1 miliardë e 257 milionë eurosh për të gjitha klubet pjesëmarrëse në këtë edicion. Mendohet, që për herë të parë, vetëm për pjesëmarrjen në turin e dytë, përfitimi i korçarëve të jetë mbi 250 mijë euro. Nëse Skënderbeu do të synojë të shkojë të paktën deri në “play-off”, atëherë rekordi do të vendoset tek të ardhurat financiare.
Këtë sezon UEFA ka vendosur që për skuadrën që fiton në “play-off” dhe vijon në fazën e grupeve, shpërblimi i menjëhershëm financiar të jetë 2 milion euro për të vijuar më pas me të tjera bonuse në fazën e grupeve. Risia qëndron tek skuadra që eliminohet në “play-off” dhe kalon në Ligën e Evropës, e cila do të përfitojë plot 3 milion euro. Kjo është një arsye më shumë që Skënderbeu këtë verë të ndërtojë një strategji perfekte për paraqitjen evropiane, në mënyrë që të vendosë rekordin edhe përsa i përket të ardhurave financiare.
