Kampionia e Shqipërisë, Skënderbeu, është shumë pranë një suksesi historik. Gjithçka do të varet nga dy përballjet që do të ketë në turin e tretë paraeliminator të Ligës së Kampioneve, ku shorti e ka vënë përballë moldavëve të Milsamit, një skuadër shumë e fortë gjatë viteve të fundit dhe që ka pasur një sukses të madh. Ndeshja e parë luhet sonte në orën 19:00 në Moldavi.

Dhe korçarët do të tregojnë kujdes që të mos pësojnë humbje, me shpresa të mëdha se mund t’ia dalin të marrin rezultat pozitiv që do t’i favorizonte për ndeshjen e kthimit dhe për kualifikimin. Vetëm dy takime larg historisë dhe skuadra e trajnerit Mirel Josa ka shansin e madh të futet në fazën e grupeve të Ligës së Kampioneve, ose, më e pakta, në fazën e grupeve të Ligës së Evropës, gjithmonë nëse eliminon Milsamin.

Optimizmi është shumë i madh, por Skënderbeu ka udhëtuar dje drejt Kishinjevit, kryeqytetit të Moldavisë, me mungesa të rëndësishme dhe me probleme sidomos në repartin e mbrojtjes. Synimi parësor i Skënderbeut në Moldavi do të jetë të shënojë minimalisht një gol që në fushën kundërshtare ka vlerë dyfish dhe mund t’i ndihmonte shumë korçarët për të kaluar me suksesin edhe turin e tretë eliminator të Ligës së Kampioneve.

Trajneri Josa është shprehur optimist para nisjes për në Moldavi, duke thënë se do të tentojnë fitoren. “Ky është një tur më i vështirë se ai që kaluam, – ka deklaruar kryeqytetasi i stolit korçar. – Milsami ka surprizuar, por ne kemi besim në vlerat e skuadrës tonë dhe shpresojmë të marrim rezultat pozitiv. Nuk kemi në plan të luajmë në mbrojtje, përkundrazi, sipas situatës ne do të tentojmë të fitojmë ndeshjen.”