ASNN – Të hënën në mbrëmje, Rrjeti i Radio-Televizionit Shqiptar do të sjellë për teleshikuesit, ndeshjen më të rëndësishme të javës së 26-të të Kategorisë Superiore, atë midis Partizanit dhe Skënderbeut. Dy skuadra rivale për titull, të cilat do të japin gjithçka për të marrë tri pikët nga kjo ndeshje.
Kështu, java e 26-të e Kategorisë Superiore kulmon me supersfidën Partizani-Skënderbeu. Dy skuadra që luajnë të hënën, të kuqtë e vendit të dytë për t’iu afruar kreut, ndërsa miqtë nga Korça, kryesues të kampionatit, për të thelluar diferencën me ndjekësit.
Trajneri i Skënderbeut, Mirel Josa, e vlerëson mjaft kundërshtarin, për shpirtin e garës që tregon në fushë. Ndërsa e quan të hapur deri në fund të kampionatit luftën për titullin “kampion”, pavarësisht se si do të dalë rezultati i kësaj sfide. Ndeshja Partizani-Skënderbeu luhet të hënën në orën 19:00, në Stadiumin Kombëtar “Qemal Stafa” në kryeqytet dhe do të transmetohet drejtpërdrejt nga Rrjeti i Radio-Televizionit Shqiptar.
