ASNN – Silvinjo, tur për të parë e takuar lojtarët. Trajneri i Kombëtares kuqezi kalon fundjavën në Gjermani e në Itali. Federata Shqiptare e Futbollit (FSHF) ka bërë të ditur se të premten, Silvinjo dhe Doriva ishin në Frankfurt për të ndjekur nga afër ndeshjen midis Eintrahtit vendas dhe Maincit dhe menjëherë më pas kanë udhëtuar në Itali, aty ku është bashkuar edhe Pablo Zabaleta. Kështu, trajneri i Kombëtares, së bashku me ndihmësit e tij, kanë nisur sërish nga puna për të takuar nga afër lojtarët kuqezi që aktivizohen nëpër Evropë.
Trajneri i Kombëtares, Silvio Mendesh Kampos Zhunjor, së bashku me ndihmësit e tij, Dorival Guidoni Zhunjor dhe Pablo Zabaleta, kanë nisur sërish nga puna për të takuar nga afër lojtarët kuqezi që aktivizohen nëpër Evropë. Federata Shqiptare e Futbollit (FSHF) ka bërë të ditur se të premten më datë 26 janar, Silvinjo dhe Doriva ishin në Frankfurt në stadiumin “Deutsche Bank Park” për të ndjekur nga afër ndeshjen midis Eintrahtit vendas dhe Maincit dhe menjëherë më pas kanë udhëtuar në Itali, aty ku është bashkuar edhe Pablo Zabaleta.
Kujtojmë që në radhët e Eintrahtit militon portieri i ri shqiptar, Simon Simoni, ndërsa tek Mainci luan edhe Brajën Gruda, por edhe Nelson Vajper. Të dy këta të fundit kanë luajtur me përfaqësueset e moshave të Gjermanisë, për FSHF-ja ka bërë përpjekje për t’i joshur në fanellën kuqezi, teksa kanë prindër shqiptarë. Ndërkaq, trajneri Silvinjo dhe ndihmësit e tij kanë takuar nga afër futbollistët shqiptarë që aktivizohen në kampionatin italian dhe kanë diskutuar për shumë tema, gjendjen e tyre, grumbullimin e radhës, sfidat miqësore dhe për kampionatin Evropian “Gjermani 2024”.
Këto takime janë mjaft të rëndësishme për trajnerin kuqezi, që ka mundësi të shohë nga afër gjendjen e disa prej lojtarëve të Kombëtares dhe të diskutojë me to. Trajneri ka pasur komunikime të vazhdueshme me lojtarët dhe është në kontakt të vazhdueshëm me të gjithë futbollistët, teksa në vijim Silvinjo së bashku me ndihmësit e tij do të programojnë takime të tjera me futbollistët kuqezi.
