Në Eliminatoret e grupit I për finalet e Kampionatit të ardhshëm Evropian “Francë 2016” për Shqipërinë mbeten dhe 180 minuta garë. Pra janë dy ndeshjet e fundit dhe vendimtare për fatet e saj këtë edicion, ku shanset janë të mëdha për një kualifikim historik. Natyrisht, humbja me Portugalinë i ka vështirësuar disi gjërat në grup për Kombëtaren tonë, por shpresat nuk janë shuar, pasi kemi dhe dy ndeshje dhe ky ekip ka treguar se di të përballojë presionin.
Por, në momentin kur të gjithë kërkojnë që Kombëtarja të jetë e qetë dhe të motivohet për sfidat e radhës, ndodh një fërkim krejt i panevojshëm dhe një lojë fjalësh për kontratën e trajnerit Xhovani De Biazi, përplasje e nxitur me sa duket nga zyrtarët e lartë të FSHF-së. Kjo gjë ka sjellë disa pikëpyetje jo vetëm për vazhdimësinë e trajnerit në krye të përfaqësueses tonë, por ndikon mbi të gjitha negativisht në pritshmëritë e skuadrës në dy ndeshjet e fundit.
Debati vijon i fortë dhe në media dhe zërat që janë bërë “avokatë” të De Biazit janë të shumtë. Kuptohet, kanë argumente plot pasi De Biazi ka rezultate dhe ato duken e nuk mohohen. Duke folur për këto zhvillime, por edhe mundësisë së kualifikimit, ish-futbollisti i Dinamos dhe Kombëtares, Shyqyri Ballgjini, me besim të plotë thotë se de Biazi është trajneri i duhur për Kombëtaren dhe çelësi i suksesit të kuqezinjve në vitet e fundit.
Pasi i radhit mirë argumentet e tij, Ballgjini nuk lë pa kujtuar edhe periudhën e mëparshme, kur ekipet i drejtonin jo profesionistët, por agronomët dhe të tjerë që nuk ishin të fushës. Ndryshe nga skeptikët, Ballgjini ka besim në kualifikim dhe këtë shpresë e bazon tek puna dhe rezultatet e de Biazit. Për të, një fitore me serbët më 8 tetor çon në rrugën e duhur dhe të kualifikimit ekipin kuqezi. Intervistën e tij të plotë, dhënë të përditshmes shqiptare, “SOT”, AlbanianSport.com do t’jua sjellë në dy pjesë, të martën dhe të mërkurën.