ASNN – Skuadra e trajnerit Sinan Bardhi fikson rezultatin më të thellë të sezonit në Kategorinë e Parë. Kryesuesit e grupit të Veriut nuk kanë treguar pikë mëshirë për periferikët e kryeqytetit. Rrebesh golash në stadiumin “Besëlidhja” të Lezhës, atje ku kryesuesit e grupit të Veriut nuk kanë treguar asnjë pikë mëshire për periferikët e kryeqytetit nga Kamza.
Besëlidhja jo vetëm që ka fituar ndeshjen e radhës me Kamzën dhe ka shënuar gjashtë gola, por ka pasur dhe një mori rastesh të tjera për shënim, që do të thotë se shifrat e rezultatit mund të ishin dhe më të thella se 6-0. Kjo tregon se Besëlidhja është duke ecur me hapa të sigurt drejt realizimit të objektivit për t’u ngjitur në Kategorinë Superiore.
Ndërsa frenimi i Mamurrasit në Fushë-Krujë e ka ndihmuar skuadrën lezhjane që të forcojë dhe më kryesimin. Ekuilibri i saj është i qëndrueshëm dhe po tregon se është një skuadër që e meriton që kampionatin e ardhshëm të jetë në elitën e futbollit shqiptar. Ka kohë për ta fiksuar këtë rezultat, ndërsa kjo është meritë padyshim dhe e punës që ka bërë presidenti i lezhjanëve Gjok Ndoka, i cili nuk ka kursyer asgjë për ekipin dhe i qëndron skuadrës çdo ditë tek koka.
Rezultatet e deritanishme të Besëlidhjes janë duke afruar dhe tifozerinë lezhjane në stadium, e cila dhe dje ka qenë e shumtë në shkallët e stadiumit. Por jo vetëm kaq, tashmë kanë nisur të afrohen dhe pushtetarët vendorë, ndërsa dje ka qenë në stadium dhe Kryetari i Bashkisë së Lezhës, Viktor Tusha. E vërteta është se ultrasit e Besëlidhjes, quajtur ndryshe “Dragonjtë e Veriut”, të veshur me fanellat verdhekuqe, i kanë dhënë një tjetër pamje stadiumit.
Besëlidhja – Kamza 6-0
Shënues: Hoxha 2’, Jakupi 34’,
Malo 38’, Marashi 52’, 66’, Puka 86’
Besëlidhja: Demi, Baçi, Jakupi, Dibra, Gjokeja (Shytani 46’), Hoxha, Xhorxheviç, Marashi, Lini, Allamani (Turkaj 70’), Malo (Puka 56’). Trajner: S. Bardhi
Kamza: Sejdo, Nino, Udoh, Gjonaj, Abazaj, Lame, Zuna, Koleci, Olatunji (Smero 71’), Lala, Ahmetaj. Trajner: B. Doku
Gjyqtarë: J. Xhafa, A. Shkreta, A. Bixhi (Tiranë)
Karton i verdhë: Abazaj
