ASNN – Kombëtarja kuqezi ka pësuar të dielën humbjen e dytë në këto 3 ndeshje të Ligës së Kombeve, pasi është mundur 0-2 në Izrael përballë përfaqësueses vendase. Kjo ndeshje, e sjellë për sportdashësit drejtpërdrejt nga Rrjeti i Radio-Televizionit Shqiptar, është vendosur nga dy gola të shënuar nga vendasit në skajet e kundërta të secilës pjesë loje. Pjesa e parë e ndeshjes së sjellë për sportdashësit drejtpërdrejt nga Rrjeti i Radio-Televizionit Shqiptar ka nisur me presingun e vendasve që në minutën e parë, por kuqezinjtë mbijetojnë dhe vijojnë ta zhvendosin lojën në gjysmëfushën kundërshtare.
Dhe Uzuni harkon bukur nga e djathta dhe Balaj godet me kokë brenda zone, por gardiani i portës izraelite, Harush, bën mrekullinë në fundin e minutës së 7-të. Por 55 sekonda më vonë, Shqipëria gjendet e papërgatitur, kur një goditje e gjatë e portierit vendas do t’i japë mundësi Hemedit të përfitojë në skajin tjetër dhe të mposhtë Strakoshën, duke shënuar golin e tij të 17-të në 35 ndeshje me fanellën e përfaqësueses. Shqipëria është çoroditur nga goli dhe në minutën e 16-të, rrezikon të pësojë përsëri, kur Peretz godet brenda zonës pas një pasimi të marrë nga e djathta, por mbrojtësit kuqezi bllokojnë goditjen që po shkonte në portë.
Gjashtë minuta më pas, Balaj përfiton nga një harkim këtë radhë nga e majta e sulmit kuqezi dhe godet me kokë, por portieri vendas i thotë sërish “jo”, me një tjetër grushtim instinktiv. Izraeli ka zgjedhur të godasë me kundërsulme ose me anë të goditjeve të këndit, siç ishte kjo e minutës së 26-të, që përfundon jashtë. Shqipëria luan mirë për minuta të tëra dhe në të 33-tën, Balaj provon sërish me kokë në qendër të zonës, por pa e gjetur dot kuadratin. Goditje këndi 3 minuta më vonë, por goditja fluturimthi e Xhakës brenda zone, devijohet jashtë për një goditje këndi nga portieri mik. Goditja e këndit që vijon sjell një tjetër goditje me kokë të kuqezinjve, por pa problem për portierin vendas.
Pjesa e parë do të shohë Bashën të dalë nga loja i dëmtuar, por çuditërisht Lilaj nuk lejohet të hyjë në fushë për ta zëvendësuar. Mbyllet kështu 1-0 pjesa e parë në favor të Izraelit. 45 minutat e para mbyllen me epërsinë e vendasve, por e dyta nis më mirë për Izraelin, që kundërsulmon me një aksion të bukur, por Dabur gabon në goditje brenda zone, pa e gjetur dot kuadratin e Strakoshës. Ndonëse Shqipëria luan më mirë në çerekoren e parë të pjesës së dytë, është Izraeli që rrezikon me kundërsulme dhe Strakosha bën mirë për të kontrolluar një goditje nga larg në të 59-tën.
Në krahun tjetër, Hysaj harkon zgjuarsisht në zonë për Balajn, i cili është vetëm një sekondë me vonesë dhe nuk arrin ta shtyjë topin në rrjetë. Në minutën e 63-të, goditje e lirë dhe përpjekja e Memushajt devijon jashtë nga muri. Gjimshiti rrezikon me një goditje me kokë nga këndorja në vijim, por pa rezultat. Lilaj godet në kufinjtë e zonës, por portieri izraelit grushton dhe topi vjen tek Grezda, i cili nuk e kalibron siç duhet goditjen me kokë dhe shkon dëm një rast mjaft të mirë për shënim 15 minuta para fundit. Në hapësirën e vetëm pak sekondave në minutën e 80-të, Strakosha bën heroin kuqezi, duke shmangur dy herë prekjen e rrjetës së portës së Kombëtares.
Por ai s’mund të bëjë asgjë 3 minuta më pas, pasi goditja e Sabi’as është devijuar dhe është prehur në rrjetë. Shqipëria do të përpiqet, por goditja e Memushajt në minutën e 88-të, ndonëse e rrezikshme, zotërohet në dy kohë nga portieri vendas, Harush. Mbyllet kështu me fitoren 2-0 të vendasve kjo sfidë dhe Shqipëria komprometon kështu shanset për të shpresuar për vendin e parë, për të cilin Izraeli shpreson realisht pas kësaj ndeshjeje.
