ASNN – Një pikë e vështirë, por sidoqoftë e vyer ka qenë ajo që Shqipëria ka marrë të martën në mbrëmje në Maqedoni përballë përfaqësueses vendase. Ndeshja që u soll për sportdashësit drejtpërdrejt nga Rrjeti i Radio-Televizionit Shqiptar është vendosur nga dy gola të shënuar nga secila skuadër në pjesën e dytë.
Përtej rasteve të shumta të vendave, mbyllet me rrjeta të paprekura pjesa e parë e sfidës së Strumicës, ndërsa e dyta fillon me dy ndërrime për Kombëtares shqiptare, pasi Basha dhe Memushaj kanë zënë vendin e Llulakut dhe Kukelit, duke përforcuar kështu mbrojtjen.
Ndërrimet kanë dhënë fryte, pasi Shqipëria është më e mbledhur në lojën e saj dhe e hedh vështrimin drejt gjysmëfushës kundërshtare, ku, në minutën e 52-të, Sadiku ndërmerr një depërtim personal nga e majta, harkon në zonë, aty ku Roshi ka goditur saktë me kokë, duke mposhtur portierin vendas dhe duke përshëndetur rrjetën.
Trysnia e vendasve jep fryte në minutën e 78-të, kur shënuesi i golit, Roshi, prek topin me dorë brenda zone, gjyqtari Erikson jep 11-metërsh për maqedonasit. Godet nga pika e bardhë Trajkovski, barazon shifrat në 1-1. 10 minutat e fundit të kohës së rregullt flasin më tepër për vendasit të cilët e kërkojnë me ngulm golin e fitores.
Sidoqoftë, mbyllet me shifrat 1-1 kjo sfidë dhe Shqipëria konsolidon edhe më tepër vendin e 3-të të renditjes së grupit G, me 13 pikë, ndërsa Spanja, që ka fituar 8-0 ndaj Lihtenshtejnit, kryeson me 22 pikë, 3 më tepër sesa Italia e vendit të dytë, që fitoi 1-0 ndaj Izraelit.
