ASNN – Italia i shkakton humbjen e 3-të kombëtares shqiptare. Të premten në mbrëmje në Palermo, kuqezinjtë u mundën 2-0 nga vendasit, pas një loje ku spikatën raste nga të dyja skuadrat. Por italianët u treguan më të saktë dhe arritën të shënojnë dy herë në portën tonë. Pas kësaj fitoreje, Italia dhe Spanja vazhdojnë të kryesojnë grupin G me nga 13 pikë secila, me iberikët të parët, falë golaverazhit më të mirë.
Kështu, Kombëtarja shqiptare pëson humbjen e tretë në këto Eliminatore të Botërorit “Rusi 2018”. Pas Spanjës e Izraelit, tashmë është Italia që ndëshkon skuadrën e trajnerit Xhovani De Biazi. Por ajo që mund ta ndëshkojë më shumë ekipin kuqezi, por edhe Federatën Shqiptare të Futbollit është hedhja e tymueseve në fushë nga ana e tifozëve në Palermo.
Mjegulla e krijuar në fushë e ka detyruar gjyqtarin kryesor të takimit që të ndërpresë takimin për disa minuta. Skuadrat hyjnë në dhomat e zhveshjes, ndërsa kapiteni Ansi Agolli shkon pranë sektorit të tifozëve kuqezinj, pikërisht ku ndodhen grupimet e tyre, për të folur me ta. Edhe trajneri De Biazi është mjaft i shqetësuar. Ky gjest mund ta dëmtojë shumë skuadrën kuqezi.
Kjo pasi ishte paralajmëruar nga UEFA për hedhjen e flakadanëve në fushë dhe tashmë rrezikon të luajë një ndeshje pa tifozë. Por përtej kësaj në “Renzo Barbera”, skuadrat priten me ovacione ndërsa këndojnë edhe himnet përkatëse. Ndeshja e shumëpritur për të gjithë tifozët shqiptar, nis me emocione. Që në minutën e parë, është pikërisht Shqipëria që ka inisiativën teksa rrezikon.
Është Cikalleshi, i cili, brenda zonës e kalon topin shumë pranë shtyllës pingule të mbrojtur nga Bufoni, duke shpërdoruar një rast të pastër. Dy minuta më vonë, është Roshi që provon me një goditje nga larg, por, pa sukses. Në të 7-ën rrezikon Italia, por Hysaj e largon topin jashtë për një goditje këndi. Në këto minuta të mira për Shqipërinë, Migjen Basha pengon brenda zonës Belotin dhe gjyqtari jep 11-metërsh.
Ndërsa pritej goditja e topit, në zonën tonë ka flakadanë tymues. Megjithatë, loja vazhdon dhe De Rosi gjuan nga pika e bardhë dhe 1-0 për Italinë. Rastet krijohen nga të dyja skuadrat. Në të 22-ën minutë, Shqipëria rrezikon sërish me Roshin, ndërsa më pas, në të 37-ën, De Rosi provon me kokë brenda zonës por topi kalon mbi shtyllën horizontale.
Në minutën e 42-të, Italia rrezikon me Belotin, që gjuan fuqishëm me të djathtën, por edhe grushtimi i Strakoshës është mjaft i bukur. Pjesa e parë do të mbyllej me një rast të Odise Roshit në minutën e 44-t, që i vetëm brenda zonës, gjuan me të djathtën, por në mënyrë të gabuar. Në pjesën e dytë Italia shënon edhe golin e dytë. Në të 70-ën, Çiro Imobile, shënon, duke shfrytëzuar një pakujdesi të mbrojtjes kuqezi, pas topit të ardhur nga krahu i djathtë.
Pas kësaj fitoreje Italia vazhdon të kryesojë grupin G, së bashku me Spanjën me pikë të barabarta, 13.
