ASNN – Kombëtarja shqiptare e Nën-21 vjeçarëve, që njihet ndryshe si “Shpresat”, ka zhvilluar të martën një ndeshje miqësore me Skënderbeun. Korçarët kanë fituar 3-1, falë golave të realizuar nga Pedresku, Plaku dhe Gavazaj. Golin e vetëm për kuqezinjtë e vegjë e realizoi Mustafa. Kështu, vazhdojnë ndeshjet testuese për futbollistët e grumbulluar nga trajneri Alban Bushi në kombëtaren e Nën-21-vjeçarëve. Dhe, të martën, kuqezinjtë janë përballur me ekipin kampion të Shqipërisë, Skënderbeun.
Në ndeshjen e zhvilluar në Stadiumin “Selman Stërmasi” në kryeqytet, e cila u transmetua drejtpërdrejt në kanalin e dytë tokësor të Rrjetit të Radio-Televizionit Shqiptar (TVSH 2), korçarët kanë fituar 3-1. Në fakt, pjesa e parë është mbyllur me rrjeta të paprekura. Skuadra e trajnerit Ilir Daja ka patur më shumë raste për shënim gjatë këtyre minutave por pa mundur të shënojë, falë edhe pritjeve të gardianit të portës së Nën-21-vjeçarëve kuqezinj, Kastrati.
Ndërkohë, pjesa e dytë nis me gol. Është Skënderbeu që shënon në minutën e 49-të, me anë të Kornel Pedreskut. Kurse në të 60-ën minutën, dyfishon shifrat Sebino Plaku. Pas 8 minutash, Valdrin Mustafa shënon për ekipin e Shpresave. Futbollisti që luan me Kaizerslauternit, arrin të shënojë me anë të një sprinti, duke lënë pas edhe mbrojtjen korçare dhe duke ngushtuar diferencën në 2-1. Në minutën e 81-të, Skënderbeu shënon edhe golin e tretë.
Është Enis Gavazaj ai që, me një gjuajtje brenda zonës, mposht portierin Kastrati. Me rezultatin 3-1 mbyllet kjo miqësore. Trajneri i kuqezinjve Nën-21-vjeçarë, Alban Bushi, aktivizoi mjaft lojtarë gjatë kësaj ndeshjeje miqësore. Disa prej tyre mund të veshin më pas fanellën e ekipit të Shpresave në ndeshjet zyrtare eliminatore të Kampionatit Evropian të kësaj grupmoshe.
