ASNN – Më 28 maj, Shpresat ndeshen me Bosnjë-Hercegovinën, për të vijuar me përballjen me Bjellorusinë, më 5 qershor, dhe për ta mbyllur 3 ditë më pas me sërish me të njëjtën skuadër, ndërsa të 3 takimet do të luhen në Stadiumin “ElbasanArena”. Për të folur për këto miqësore, kanë dalë para mediave sot trajneri Alban Bushi dhe kapiteni Kejdi Bare.
Në harkun e dy javëve, Kombëtarja kuqezi e Nën-21-vjeçarëve, që njihet ndryshe si Shpresat, do të luajë 3 ndeshje miqësore dhe për trajnerin Alban Bushi, kjo është një provë shumë e mirë për lojtarët e rinj për të treguar veten. ” Ndeshjet miqësore zhvillohen për të testuar futbollistët, kemi marrë shumë futbollistë të rinj, kemi rinovuar 90 % të skuadrës”, – ka thënë ai.
“Përzgjedhja që ne kemi bërë është e mirë, fakti që ekipi kombëtar ka grumbulluar Selmanin,kjo tregon cilësinë, është bërë një punë e mirë nga i gjithë stafi i ekipit kombëtar, kemi shumë lojtarë të talentuar që trajneri Panuçi i ka në vëzhgim dhe do ti afrojë në Kombëtaren e të rriturve, – ka vijuar ish-futbollisti. – Në Eliminatorët e radhës, pavarësisht se kemi ende ndeshje për të zhvilluar, me përvojën e fituar do të synojmë kualifikimin.”
“Sa i përket ndeshjes së parë miqësore që kemi nesër ndaj Bosnje-Hercegovinës kemi të bëjmë me një kundërshtar relativisht të fortë. Na vlejnë këto përballje për tu përmirësuar në vijimësi ndaj kemi afruar futbollistë të rinj me cilësi shumë të mira.”-përfundoi trajneri i Shpresave, Alban Bushi, duke folur nga Elbasani. Fjalëve të trajnerit u ka bërë jehonë edhe kapiteni Kejdi Bare.
“Natyrisht, çdo ndeshje është e rëndësishme, si miqësoret si ndeshjet zyrtare, ne do të japim maksimumin që të arrijmë një fitore në miqësoren e parë nesër ndaj Bosnje-Hercegovinës në orën 19:00, – ka premtuar ai. – Për mua është njëlloj si Kombëtarja e Nën-21-vjeçarëve dhe Kombëtarja e të rriturve, pasi shkallët ngjiten me radhë. Në ekipin përfaqësues janë afruar futbollistë të rinj, me të cilët do të përshtatemi.
“Ata kanë cilësi dhe kjo është diçka e mirë, ndaj besoj dy vitet e fundit, skuadra e Shpresave ka rritje në cilësi dhe po i shërben Kombëtares së të rriturve”, – përfundoi Bare. Më 28 maj, Shpresat ndeshen me Bosnjë-Hercegovinën, për të vijuar me përballjen me Bjellorusinë, më 5 qershor, dhe për ta mbyllur 3 ditë më pas me sërish me të njëjtën skuadër, ndërsa të 3 takimet do të luhen në Stadiumin “Elbasan Arena”.
