ASNN – Kupa e Shqipërisë 2023-2024, shorti për fazën gjysmëfinale do të hidhet të martën në “Shtëpinë e Futbollit”. Federata Shqiptare e Futbollit (FSHF) ka njoftuar se do të organizojë hedhjen e shortit për fazën gjysmëfinale të Kupës së Shqipërisë 2023/2024, ditën e martë më datë 12 mars, në orën 11:00.
Shorti do të zhvillohet në mjediset e “Shtëpisë së Futbollit”, siç njihet ndryshe selia e re e FSHF-së në kryeqytet, në sallën e konferencave për shtyp dhe do të jetë i hapur për mediat, ndërsa do të marrin pjesë edhe përfaqësuesit e 4 klubeve të kualifikuar deri në këtë fazë e më konkretisht Tirana, Kukësi, Vllaznia dhe Egnatia.
Nga shorti do të përcaktohen dy çiftet gjysmëfinaliste. Ndeshjet e para të fazës gjysmëfinale do të luhen më datë 3 prill 2024. Ndërsa takimet e dyta ku do të përcaktohen edhe dy skuadrat që do të shkojnë në finalen e madhe të Kupës së Shqipërisë, do të zhvillohen më datë 24 prill 2024.
