ASNN – Shkumbini do të përballet sot me Dinamon në fushën e kësaj të fundit, në një ndeshje ku skuadra e drejtuar nga Ilir Gjyla do të kërkojë të marrë një rezultat pozitiv. Dikur këto dy skuadra janë ndeshur për vite e vite me radhë në Kategorinë Superiore, aty ku kanë shprehur edhe potencialin e tyre.

Por tani fati e do që të përballen në të njëjtin grup edhe në Kategorinë e Parë. Skuadra peqinase vjen këtë sezon jo me pak probleme, atje ku ndryshe nga herët e tjera synon qëndrimin në këtë nivel të dytë të Kampionatit Kombëtar të Futbollit dhe për më tepër që ka vetëm tri pikë në klasifikim.

Për këtë ndeshje bardhekaltrit do t’i kënaqeshin edhe një pike, sepse dihet që në kampionatin shqiptar nuk është e lehtë të fitosh në transfertë, ndonëse në Tiranë luhet futboll dhe nëse e meriton e merr rezultatin. Të gjitha gjasat janë që trajneri Gjyla ta ketë grupin të plotë në këtë përballje.