ASNN – Shkumbini dhe Butrinti ndodhen shumë pranë me njëri-tjetrin në renditje dhe ndahen me një diferencë prej tre pikësh mes tyre. Ndaj peqinasit e kanë mëse të qartë se nuk duhet të bëjnë ndonjë hap pas, sepse vetëm kështu mund të ruhet dhe mund të thellohet edhe më shumë kjo diferencë pikësh.

Ndaj në përballjen direkte ndaj Butrintit, mesfushori Lluca beson se synimi i vetëm është arritja e trepikëshit, i cili konsolidon formacionin. “Kjo fundjavë do të jetë shumë e rëndësishme për ne, – ka thënë ai. – Kemi një përballje vërtet të vështirë, pasi na duhet të presim një kundërshtar direkt për luftën në mbijetesë.”

“Për ne çdo ndeshje është një finale, ndaj duke e vlerësuar si të tillë edhe kjo ndaj Butrintit, – ka vijuar peqinasi. – Mendoj se në ndeshjen e radhës duhet të arrijmë një fitore. Ne e vlerësojmë kundërshtarin dhe e kemi të qartë se edhe miqtë nuk do të vijnë të pamotivuar.”

“Por fakti që kemi një ndeshje në shtëpi na duhet ta shfrytëzojmë, pasi çdo hap i gabuar mund t’i japë pasojat e veta në fazën e tretë kur përballjet për mbijetesë arrijnë kulmin e vështirësisë. Për mendimin tim personal dëshira është e madhe që të shënoj dhe të ndjej një kënaqësi të dyfishtë, së bashku me fitoren”, – ka përfunduar Lluca.