ASNN – Në takimin Shkumbini-Luftëtari, minutat e para të lojës janë të qeta nga të dyja ekipet, të cilat mundohen më shumë që të studiojnë lojën e njëra-tjetrës. Mirëpo, me kalimin e minutave, vendësit të drejtuar nga Ilir Gjyla kontrollojnë lojën dhe fillojnë të shfaqen rrezikshëm në portën e Thanos.

Do të jetë Sulkja ai që provon në minutën e tetë me një goditje nga jashtë zone, por Thano grushton, duke mos lejuar prekjen e rrjetës. Rastin tjetër, po me një goditje nga jashtë zone, ndonëse pa shumë pretendime, e kanë miqtë me Mersinin. Goditja e tij grushtohet fillimisht nga portieri Ajazi, por që u desh edhe “ndihma” e shtyllës për të mos lejuar prekjen e rrjetës.

Pjesa e parë, përpos volumit të lojës, nuk ka ndonjë rast të veçantë për t’u shënuar, ndryshe nga e dyta që gjen një Shkumbin më kërkues dhe që ia arrin të gjejë rrugën e rrjetës me anë të Artur Maganit. Në minutën e 77-të, Gjata fut një top në zonë, aty ku Magani ndodhet i pambuluar, godet dhe shënon golin e fitores për Shkumbinin.

Tifozët e shumtë në tribunë, por edhe stoli peqinas është në delir, sepse kjo rrjetë i largon ato nga vendi i fundit, por ende kanë shumë punë për të arritur mbijetesën. Nga ana tjetër, gjirokastritët rëndojnë shumë pozitat e tyre në klasifikim, ku rrezikojnë rënien në Kategorinë e Dytë.

Shkumbini – Luftëtari          1-0

Shënues: Artur Magani 77’

Shkumbini: Ajazi, Lundraxhiu, Isai, E. Magani, Sulkja (Turhani 81’), Lluca (Nexha 65’), Kafazi, Xhyra, A. Magani, Dervishi (Meta 92’), Gjata. Trajner: I. Gjyla

Luftëtari: Thano, Rexha, Brahimi, Zholi, Dosti, Shenaj, Duka, Çunaj, Mersini (Gaba 80’), Tahirllari (Biraçaj 30’), Frashëri. Trajner: B. Devolli

Gjyqtarë: E. Demiraj, A. Mema, G. Kamolli (Pogradec)

Kartonë të verdhë: Isai, Gjata, Xhyra, Dervishi, A. Magani / Brahimi