ASNN – Mbrojtësi shqiptar Shkodran Mustafi ka thënë se nuk do të transferohej te skuadra e Valencias, nëse ajo nuk do ta kishte në projektin e saj kualifikimin në Ligën e Kampionëve. Ai ka thënë se një sukses të tillë synon ta arrijë edhe në edicionin e ri 2015-2016.
23-vjeçari ishte një nga lojtarët kyç te Valencia, që arriti të përfundojë e katërta në një nga kampionatet më të fortë në botë, “La Ligën” spanjolle. Për t’u kualifikuar në fazën e grupeve të Ligës së Kampionëve, Valencia do të duhet që të fitojë në dy përballjet e “play-off”-it.
“Së pari duhet të kualifikohemi për në fazën e grupeve të Ligës së Kampioneve, pasi kjo është shumë me rëndësi për ne, – ka thënë kampioni i botës me Gjermaninë në 2014-rën Mustafi në një intervistë për “spox.com”. – Por, nuk do të jetë aspak e lehtë. Megjithatë, kemi një ekip të mirë.”
“Projekti i skuadrës ishte që ne të paraqitemi në Ligën e Kampioneve për këtë edicion që ende nuk ka nisur. Në të kundërtën nuk do të isha transferuar te Valencia e cila më ka bindur me projektin serioz”, – ka përfunduar Shkodran Mustafi, duke folur për median në fjalë.
