ASNN – Java e 15-të e Kategorisë Superiore të Kampionatit Kombëtar të Futbollit prodhoi sot surpriza të shumta, sidomos në Korçë, ku Teuta mundi Skënderbeun me rezultatin e ngushtë 1-0. Ishte një ndeshje ku lojën e bënë korçarët, ndërsa golin dhe fitoren e realizuan durrsakët. Pjesa e parë dhuroi edhe momente që ndodhin rëndom në kampionatin shqiptar, ku një skuadër krijon volum të madh loje, por duket se nuk ka fantazi e saktësi, madje as dëshirë për të gjetur rrjetën.

Në minutën e 30-të, Kamara shfrytëzoi mjaft mirë me kokë një krosim nga krahu dhe mposhti portierin Teqja, duke kaluar durrsakët në epërsi, 1-0. Ky gol bëri që Teuta të ndihej më e qetë, por iu desh për minuta të tëra të mbrohej nga breshëria e goditjeve të kundërshtarit, por topi, çuditërisht, nuk shkonte në rrjetë. Një 11-metërsh në fund të pjesës së parë mund të kishte sjellë barazimin e shifrave nga Skënderbeu, por nuk qe e thënë.

Nga pika e bardhë, Aliti nuk u tregua i saktë, duke ia dhënë praktikisht topin në dorë portierit të Teutës. Një shans i humbur për skuadrën e trajnerit Orges Shehi, i cili tentoi të lëvizë në formacion për të afruar skuadrën tek goli i barazimit.Edhe pse Skënderbeu e dominoi takimin deri në fund, nuk ia doli të barazojë shifrat, për pasojë fiton Teuta 1-0, duke marrë një trepikësh që kërcënon drejtpërdrejt vetë skuadrën korçare në vend të dytë, tashmë me Teutën vetëm 2 pikë larg (30-28).

Tashmë në kryesim nuk është vetëm Partizanin e Skënderbeun, por edhe Teutën si një skuadër pragmatiste dhe që po tenton të kapë kreun me “metodat” e saj, që janë kundërsulmi, loja racionale, sulm efikas, pragmatizmi, qetësia, trajneri i aftë dhe, kryesorja, zhdërvjelltësia për të kuptuar gjendjen psikologjike të kundërshtarëve në Superiore. Natyrisht, merita u takon lojtarëve dhe trajnerit Shkëmbi, që ia kanë dalë këto javët e fundit të jenë skuadër më efikase sesa Partizani e Skënderbeu kryesues.

Kategoria Superiore

Java e 15-të

Të premten, 30 nëntor 2018:

Partizani – Tirana                 2-1

Të shtunën, 1 dhjetor 2018:

Luftëtari – Kukësi                  0-1

Skënderbeu – Teuta                        0-1

Të dielën, 2 dhjetor 2018:

Laçi – Kamza                         (14:00)

Kastrioti – Flamurtari            (14:00)

Renditja

Nr. Skuadra               Pikë

1. Partizani 34
2. Skënderbeu        30
3. Teuta 28
4. Kukësi 27
5. Laçi 25
6. Flamurtari 22
7. Luftëtari 13
8. Tirana 11
9. Kamza   8
10. Kastrioti 7