ASNN – Mediat zvicerane sulmojnë Klopin dhe Liverpulin që la jashtë Shaqirin: U përulën nga presioni i serbëve. Trajneri i Liverpulit, Jurgen Klop dha dy herë argumentimin e tij për lënien jashtë skuadrës të Xherdan Shaqirit në kuadër të përballjes së kthimit me Crvena Zvezdën (Yllin e kuq) e Beogradit. Ashtu si në konferencën e parë në Liverpul, edhe në kryeqytetin serb trajneri gjerman i “Të kuqve” tha se e la jashtë shtatshkurtrin për të mos krijuar incidente dhe që kjo ndeshje të shërbejë vetëm për futboll e aspak për politikë.
Por mediat zvicerane sot e kanë “masakruar” Klopin , duke e quajtur frikacak dhe një njeri që ngatërroi futbollin me politikën. Madje mediumet sportive zvicerane dhe jo vetëm e konsiderojnë deklaratën e Klopit të papërgjegjshme dhe gjithë kjo sjellje e tij dhe e klubit të Liverpulit tregon përulësi ndaj serbëve, të cilët e fituan duelin e tyre me anglezët vetëm për këtë fakt, duke i ndryshuar formacionin Jurgen Klopit. Sipas mediave zvicerane, presioni politik në futboll u shtua me lënien jashtë ekipit të Xherdan Shaqirit.
“Shaqiri u la jashtë nga një gjest, por që nuk ka aspak lidhje me një deklaratë politike, – shkruajnë mediat helvete. – Ai u la jashtë që të mos përzihet politika me sportin. Liverpuli po lejon politikën të ndërhyjë në sport dhe kjo është edhe më tragjike. Fituesi është caktuar përpara fillimit: Janë nacionalistët serbë. Edhe nëse yjet e tyre të kuq nuk shkëlqejnë sonte dhe pësojnë humbje, nacionalistët mund të krenohen. Më e pakta, është që ata arritën të ndryshojnë formacionin e Liverpulit edhe pa qenë aktivë në fushën e blertë.”
“Edhe, ta mendosh se takimi Crvena Zvezda-Liverpul nuk ka prodhuar tituj të mëdhenj në media, deri në momentin që ndërhyri Klop dhe njoftoi se nuk do të grumbullojë Shaqirin”, – përfundojnë mediumet zvicerane. Çfarëdo rezultati të ketë nga kjo ndeshje, duket se serbët e korrën fitoren e tyre të parë në grup, pasi detyruan klubin anglez të mos merrte me vete në Beograd shqiptarin Xherdan Shaqiri. Dhe ky nuk është futboll por politikë.
