ASNN – Shahu në Berat është një nga sportet më të njohura në qytet, por shqetësimi kryesor i dashamirësve të këtij sporti është mungesa e Tomorit në Kampionatin Ekipor. Dhe ky është edicioni i 9-të radhazi që Tomori mungon në Kampionatin Ekipor, ndaj dhe specialistët e shahut në Berat ndihen të shqetësuar. Por në të njëjtën kohë shqetësimi tjetër është dhe evidentimi i talenteve, ndonëse Artur Shehu mundohet të sponsorizojë shahun në Berat.
Madje duke e kthyer ish-shtëpinë e Ushtarakëve në Berat në sallë shahu. Dhe nëpërmjet një prononcimi për “Sport Ekspres” ai ka kërkuar të sensibilizojë drejtuesit e Bashkisë së Beratit për të menduar më shumë për shahun. “Mungesa e Tomorit në kampionatin ekipor më ka sjellë një keqardhje të madhe, sepse pash që në kampionat kishte dhe ekipe të panjohura, – ka thënë ai. – Madje ekipe me shahistë të huazuar, të cilët zënë dhe vende nderi.”
“Familjes së madhe të shahut shqiptar i mungon Tomori, ndaj kjo duhet t’i shqetësojë të gjithë, – ka vijuar Shehu. – E kjo jo vetëm për faj të drejtuesve të Bashkisë së Beratit dhe klubit shumësportësh “Tomori”, por dhe për neglizhencë të Federatës Shqiptare të Shahut. Këta të fundit duhet të kuptojnë që për traditën që ka shahu në Berat qëndron mbi të tjerët. Dhe meriton një tjetër përkujdesje. Jo vetëm kaq, por emërimi i një mjeshtri të FIDE-s si Leonard Kolani në krye të shahut beratas është një vepër që duhet përshëndetur nga Bashkia.”
“Por ajo që nuk kuptoj është se si trajneri nuk ka marrë mundimin të organizojë ekipin kur në kampionat merrnin pjesë me shahistët e Tomorit, Naftëtari, Skrapari apo dhe Roskoveci, – ka vijuar ai. – E sot nuk merret pjesë se nuk ka lekë. Dhe unë fajësoj klubin shumësportësh Tomori dhe Bashkinë e Beratit që nuk po e vlerësojnë shahun. Madje mbyllën paturpësisht shahun në Qendrën Kombëtare të Fëmijëve. Një keqardhja kam dhe për Kolanin, i cili po investon për të ardhmen me krijimin e Akademisë, por duhet të ishim përfaqësuar me të rriturit.”
“Ne kemi një traditë kur kemi emra si Arben Dardha, Fotjon Petritaj, Hyqmet Dardha, Leonard Kolani, apo dhe Llambi Qendro. Me këta Tomori do të pretendonte titullin dhe nuk ka nevojë për të huazuar shahistë tek të tjerët. Ndaj duhet t’i rikthejnë sytë nga krijimi i shahut”, – ka përfunduar Artur Shehu.
