Seminari i instruktorëve të shahut në shkolla, që ka nisur dje nën drejtimin e Vlad Ungureanus, i cili ka ardhur nën emrin e Federatës Botërore dhe Evropiane, do të jetë fillesë për vjeljen e talenteve për këtë sport. Kështu e ka cilësuar Mjeshtri i Madh Ndërkombëtar, Erald Dervishi, që ka përshëndetur në ceremoninë e hapjes së seminarit, por njëkohësisht dhe në promovimin e dy librave të shahut për fillestar, një për mësuesit dhe një për nxënësit.
“Do të jetë një element i jashtëzakonshëm për shahun dhe të ardhmen e këtij sporti në vend, po pse jo dhe për fillimin e Akademisë së Shahut. Më pas kemi të drejtën të kërkojmë pse jo dhe kampion bote e kampion Evrope”, ka thënë Dervishi. Por një vlerësim maksimal për këtë seminar të shahut në shkolla ka ardhur nga zëvendësministrja e Arsimit dhe Sportit, Nora Malaj, sipas të cilës kjo do të përmirësojë dhe më shumë jo vetëm kurrikulën e shkollës, por dhe jetën e vetë fëmijëve.
“Është një projekt ambicioz, atje ku të gjithë e shihnin me spekticizëm, – ka thënë ajo. -Por përfshirja e të gjithë komponentëve, kualifikimi i mësuesve, apo dhe qasja e fëmijëve për t’u marrë me shah, që do të jetë një përmirësim më shumë në jetën e tyre, është një vlerë. Ndaj i falënderoj të gjithë në emër të Ministrisë së Arsimit dhe Sportit”. Ungureanu, që ka ardhur së bashku me Sekretarin e Përgjithshëm të Federatës së Shahut të Rumanisë, ka shpërndarë “Mirënjohje” dhe në emër të Federatës Evropiane.
Ato kanë qenë për Erald Dervishin, Elvira Bazen, Majlinda Pilinci, Vladimir Gjonaj dhe Stavri Bellon si kontribuues në nisjen e shahut në shkolla. “Ne e kemi nisur 12 vjet më parë këtë eksperiencë në Rumani dhe është e nevojshme që ta ndajmë atë”, – ka thënë Ungureanu, ndërsa në emër të Komitetit Olimpik Kombëtar Shqiptar ka përshëndetur dhe Sekretari i Përgjithshëm, Stavri Bello. Më pas sekretarja e përgjithshme e Federatës Shqiptare të Shahut, Majlinda Pilinci, ka bërë dhe një prezantim të projektit.
Për të gjithë të pranishmit është shpërndarë libri i mësuesit dhe libri i nxënësit që ka ardhur e përkthyer nga shahistët e përvojës si Rozana Gjergji. E deri të dielën Ungureanu do të shpërndajë eksperiencën e tij për të gjithë.
