Është rikthyer Olimpiada e 42-të Botërore e Shahut pas pushimit, por turi i gjashtë e ka detyruar Shqipërinë e meshkujve dhe të femrave që të mjaftohet vetëm me barazimin e djemve ndaj Mozambikut. Një rezultat jo fort normal për lojtarët cilësorë që kemi në këtë përfaqësuese, ndërsa është rikthyer në tavolinën e parë Mjeshtri i Madh Ndërkombëtar, Erald Dervishi, i cili në fakt e ka fituar ndeshjen e tij me Mjeshtrin e FIDE-s, Alise Mateus Felizardo Viageiro.

Dhe atëherë kur pritej që të kishim fitoren e tretë për tanët ka ardhur papritmas barazimi i shahistit më të mirë të përfaqësueses sonë Dritan Mehmeti ndaj kandidat mjeshtrit Kalikoka Vilton Inacio. Sikurse është i habitshëm barazimi i Llambi Paskut, apo dhe humbja e Franc Ashikut ndaj një tjetër kandidat mjeshtri si Paiva Donaldo. Parë kështu një tjetër ndeshje jo e mirë e kombëtares së meshkujve të Shqipërisë, që vazhdon të jetë e turbullt ndërsa është mundur nga Bangladeshi 0.5-3.5 dhe nga Australia 1-3.

Dhe tani s’është në gjendje të mundë as Mozambikun. Në kuotën e 5 pikëve, Shqipëria e meshkujve është në vendin e 107-të mes 150 pjesëmarrësve, ndërsa në pikë tavoline numëron 11, të cilat vijnë: Erald Dervishi 2.5 pikë në 5 ndeshje, Dritan Mehmeti 4 pikë në 6 ndeshje, Llambi Pasku 1 pikë në 4 ndeshje, Ilir Seitaj 2 pikë në 4 ndeshje dhe Franc Ashiku 1.5 pikë në 5 ndeshje. Sot kuqezinjtë e shahut për meshkuj do të jenë përballë Bahamasit.

Olimpiada Botërore e Shahut

Rezultatet teknike të turit të 6-të:

Meshkuj

Mozambik – Shqipëri                                                                      2-2

Alise Mateus Felizardo Viageiro (FM) – Erald Dervishi                        0-1

Kalikoka Vilton Inacio (KM) – Dritan Mehmeti                            0.5-0.5

Shunguane Ilidio Alberto – Llambi Pasku                                  0.5-0.5

Paiva Donaldo (KM) – Franc Ashiku                                           1-0