Franc Ashiku, që deri në dhjetor 2016 ka pasur titullin Mjeshtër i FIDE-s (Federata Botërore e Shahut), tashmë është me titullin Mjeshtër Ndërkombëtar. Gjithçka e ka arritur falë pjesëmarrjes së tij në turneun ndërkombëtar të Montebelunas në Itali nga data 3 janar, deri më 8 janar. Ai ka zënë vendin e dytë, ndërsa në 10 ture ka grumbulluar 6.5 pikë. Në turin e parë, Ashiku ka barazuar me serbin Miroljub Laziç.
Sërish një tjetër barazim në turin e dytë, këtë herë ndaj malazezit Milan Drashko, i cili, në Kampionatin Ekipor të Shqipërisë, ishte pjesë e Naftëtarit, i cili u shpall dhe “kampion kombëtar” për vitin 2016. Në turin e tretë,ai fiton ndaj kroatit Milan Mrdxha. Në të katërtin, shkodrani shënon barazimin e 3-të, këtë herë ndaj Mjeshtrit të Madh Ndërkombëtar, bullgarit Petar G. Arnaudov.
Në të pestin merr fitoren e dytë, teksa ka mundur bullgarin tjetër, Mjeshtrin e Madh Ndërkombëtar, Vladimir Petkov. Tek i 6-ti, është shënuar një tjetër barazim i shahistit shqiptar me serbin Laziç. Përsëri barazim në të 7-tin, me Milan Drashkon. Shënon fitoren e 3-të në turin e 8-të me kroatin Milan Mrdxha. Në të 9-tin, shkodrani realizon fitoren e 4-t, me Mjeshtrin e Madh Ndërkombëtar, bullgarin Petar G. Arnaudov.
Dhe në të 10-tin është mundur nga bullgari Vladimir Petkov. Pra në këtë turne, që është luajturi me sistemin vajtje-ardhje, Ashiku ka shënuar katër fitore, pesë barazime dhe një humbje dhe në total 6.5 pikë duke u renditur i dyti vetëm një pikë larg mjeshtrit ndërkombëtar, italianit Andrea Stela. Dhe Ashiku, pas Seitajt e Mehmetit, është Mjeshtri i 3-të Ndërkombëtar i shahut shqiptar.
