ASNN – Salah shpallet për të dytin vit radhazi “Lojtari Më i Mirë i Vitit” në Afrikë. Këtë trofe futbollisti egjiptian e fiton për herë të dytë. Paraqitja e tij e shkëlqyer në kampionatin anglez dhe golat e shënuar kanë bërë që ai të marrë më shumë vota se lojtarët e tjerë kandidatë. Kështu, Mohamed Salah është shpallur “Lojtari Afrikan i Vitit”, për të dytin vit radhazi.
Ylli 26-vjeçar i Liverpulit ka lënë pas në garën për këtë titull, Manenë, Gabonin dhe Obamejangun. “Kam ëndërruar të fitoj këtë çmim që kur isha fëmijë dhe tani arrij ta fitoj dy herë rresht, – tha Salahu pasi mori trofeun në Dakar. – Falënderimet e mia shkojnë për familjen time, shokët e ekipit tim dhe dashmarësit e mi. Këtë trofe ia dedikoj atdheut tim, Egjiptit.”
Salahu bëhet kështu egjiptiani i dytë që e fiton këtë çmim pas Mahmud al-Khatibit, i cili në 1983 u votua si futbollisti më i mirë në Afrikë. Suksesi i Salahut ishte parashikuar në fakt, pasi ai vazhdon të shënojë rregullisht për kryesuesit e Premier Ligës. Egjiptiani shënoi 44 gola për Liverpulin në sezonin e kaluar, në të gjitha veprimtaritë ku ka marrë pjesë, ndërsa tani ka shënuar 13 gola.
Për ironi të fatit, Obamejangu dhe Herri Kejni kanë shënuar një gol më shumë, 14, se Salahu. Çmimin e trajnerit më të mirë në Afrikë e mori Hervë Renard, që drejton aktualisht përfaqësuesen e Marokut, ndërsa çmimin si lojtari i ri më i mirë në kategorinë e të rinjve e mori Ahraf Hakimi. Për femra lojtarja më e mirë e Afrikës së Jugut ishte Krestinah Kgatlana.
