ASNN – Nën praninë e veçantë të Presidentit të FSHF-së, Armand Duka, Kryeministrit Edi Rama, Ambasadorit Italian në Tiranë, Fabrizio Buçi, Presidentit të Federatës Italiane të Futbollit, Gabriele Gravina, bashkëshortes së Paolo Rosit, Federika Kapeleti, ish-trajnerit Arrigo Saki, ish-futbollistëve të famshëm Antonio Kabrini dhe Marko Tardeli, gjyqtarit izraelit të gjysmëfinales së Botërorit 1982, Itali-Brazil, Abraham Klein si edhe personaliteteve të futbollit shqiptar dhe përfaqësues të institucioneve të ndryshme, kjo ekspozitë u çel sot për të qëndruar e hapur e për t’u vizituar nga të gjithë futbolldashësit deri më 24 shkurt.
Ambasadori Italian në Shqipëri, Fabrizio Buçi tha se Paolo Rosi është pjesë e rëndësishme e historisë italiane. “Kam kënaqësinë që të jem sot këtu në këtë ngjarje të jshtëzakonshme, – theksoi ai. -Faleminderit të gjithëve që keni bërë të mundur të sillni këtë ekspozitë, këto kujtime të mrekullueshme, të një personi të jashtëzakonshëm, të Paolo Rosit. Ai është një pjesë e historisë italiane. Rosi i futbollit me atë skuadër të mrekullueshme të vitit 1982 përfaqëson historinë tonë.” Një fjalë përshëndetëse në hapjen e kësaj ekspozite mbajti edhe ish-trajneri i famshëm italian, Arrigo Saki. “Jam shumë i lumtur që ndodhem sot këtu në këtë vend të mrekullueshëm, qyteti ka ndryshuar shumë”, – ka thënë ai.
“Futbolli dhe sporti në përgjithësi të ndihmojnë që të jetosh më mirë dhe ky aktivitet është për të gjithë. Është një kënaqësi për mua që të jem këtu dhe sa herë që do doni që unë të vij, do të vij me kënaqësi”, – ka përfunduar ish-trajneri i famshëm italian. Drejtori i Ekspozitës, Marko Shembri falenderoi FSHF-në për bashkëpunimin për të sjellë ekspozitën edhe në Shqipëri. “Dua të falenderoj FSHF-në, në veçanti Presidentin Duka, që na kanë ndihmuar dhe na kanë dhënë mbështetjen e tyre. Sonte po e inagurojmë këtë ekspozitë dhe i ftojmë të gjithë që të vijnë ta vizitojnë”, – tha ai ndër të tjera.
