ASNN – UEFA është duke e shqyrtuar mundësinë që Kampionatin Evropian ta mbajë në vetëm një shtet këtë verë dhe jo siç ishte planifikuar në disa shtete të kontinentit. Kështu ka deklaruar kreu ekzekutiv i Bajernit të Mynihut, Karl-Hainz Rumenige. Veprimtarie, e cila ende mban emrin “Euro 2020” e që është shtyrë për qershor të këtij viti, është parashikuar të zhvillohet në 12 qytete në Evropë, por Rumenige ka nënvizuar se ky koncept u ideu para shfaqjes së epidemisë së “Covid-19”-ës.
“Nuk duhet ta harrojmë se kjo ide e veçantë e garës erdhi para se të ekzistonte virusi korona dhe ishte nisma e Komisionit Evropian, që donte që futbolli të shfaqej në tërë kontinentin”, – ka thënë ai për gazetën gjermane “Mynshner Merkur/TZ”. Qytetet mikpritëse janë vendosur të jenë Londra, Gllasgou, Dablini, Bilbao, Amsterdami, Kopenhaga, Mynihu, Roma, Shën Pjetërsburgu, Bukureshti, Budapeshti dhe Bakuja. Gjysmëfinalet dhe finalja janë parashikuar të zhvillohen në “Uembli”.
“UEFA bashkë me 12 qytete mikpritëse po punon në 4 skenarë pune për “Euro 2020”-ën, pra, me stadium të mbushur, me 50-100% të kapacitetit me masa të ndryshme lehtësuese, me 20-30% të kapacitetit me masa të ndryshme lehtësuese apo me dyer të mbyllura, – ka thënë ish-futbollisti i njohur gjerman, tashmë drejtues i gjigandes bavareze. – Secili qytet bashkë me UEFA-n do t’i përzgjedhë 2-3 skenarë dhe do të zhvillojnë plane në javët e ardhshme.”
“Vendimi se cili skenar do të aplikohet individualisht në secilin qytet gjatë garës do të merret në muajin mars”, – kanë thënë nga UEFA, sipas Rumeniges. Ndërkohë, Presidenti Aleksandar Çeferin javën e kaluar ka thënë se ka shpresë në programet e vaksinës, duke lëvizur me shpejtësi në qytete të ndryshme mipritëse dhe që do të ishte çelësi për t’i qëndruar planit të parashikuar.
