ASNN – Kërcënimi i Komitetit Olimpik Ndërkombëtar (IOC) për shtetet që nuk pranojnë sportistët e Kosovës me të drejta të barabarta ka nisur të ketë ndikimin e tij. Javën e kaluar, IOC-ja u shkroi një letër të gjitha federatave ndërkombëtare që të mos u japin organizimin e ngjarjeve ndërkombëtare shteteve që diskriminojnë sportistët, në këtë rast sportistët e Kosovës për shkak të politikës.

I menjëhershëm ka qenë reagimi i Federatës Botërore të Aeronautikës (FAI), të cilët kanë pezulluar të mërkurën Kampionatin Botëror, që parashikohej të mbahej në maj të vitit të ardhshëm në Serbi. “Për shkak të situatës politike mes Serbisë dhe Kosovës dhe politikës së Komitetit Olimpik Ndërkombëtar në lidhje me pjesëmarrjen e delegacioneve sportive dhe atletëve në ngjarjet sportive ndërkombëtare (parimi i autonomisë dhe mosdriskriminimit), Kampionati i 10-të Botëror i Aeronautikës, që do të mbahej në Vrsaç të Serbisë, nga data 15, deri më 25 maj 2019, është pezulluar”, thuhet në njoftimin e presidentit të FAI-it, Stefan Malbos, të publikuar në faqen zyrtare të saj në Internet.

Ndërkohë, Presidenti i Federatës së Aeronautikës së Kosovës, Shkëlqim Krasniqi, ka rrëfyer edhe përpjekjet e FAI-t, që ekipi i Kosovës të pranojë kushtin e garimit pa flamur. “Kam biseduar dje (e martë) në telefon me drejtuesit e FAI-t dhe kanë tentuar që të na bindin të marrim pjesë pa flamur, ose edhe të mos marrim pjesë fare”, – ka thënë ai. “U kemi thënë që nëse nuk marrim pjesë të barabartë me shtetet tjera, do t’ju padisim për diskriminim dhe në fund erdhi lajmi për anulimin e botërorit”, – ka përfunduar Krasniqi.