Në krye pas kërcimit të dytë me 15.03 metra, Katerine Ibarguen e ka dominuar deri në fund garën olimpike në kërcimin trehapësh, teksa në hedhjen e 5-të ka arritur 15.17 metra, ndërsa konkurrentet e saj nuk e kishin kapur ende kufirin e 15 metrave.
Kolumbiania, medalje e argjendtë në Londër 2012, merr revanshin e saj ndaj konkurrentes nga Venezuela, Julimar Rohas, që ishte në 14.98 metra dhe atletes nga Kazakistani, Olga Ripakova, që arriti 14.74 metra.
Ndërkaq, Anita Vlodarçik ka thyer rekordin e botës në hedhjen e çekiçit për femra me 82.29 metra në hedhjen e saj të tretë të hënën në finalen e Rios. Polakja, mbajtëse e këtij rekordi me 81.08 metra realizuar vitin e kaluar, ka konfirmuar formën e saj të mirë.
Ajo e ka nisur mirë garën me 76.35 metra në hedhjen e parë dhe 80.40 metra në të dytën. Francezja Aleksandra Tavernier, që ka qenë medalje e artë, është eliminuar. Medalistja e bronztë në botërorin e 2015-ës nuk ka mundur të bëjë më mirë se sa 65.18 metra.
Kurse Ruth Xhebet është kampione olimpike. Atletja e Bahreinit duke mundur rivalen nga Kenia e ka mbyllur e para finalen e 3,000 metrave me pengesa. Me një kohë 8’59”75, ajo ka qenë në prag të thyerjes së rekordit të botës.
Keniania Hivin Xhepkemoi është e dyta dhe amerikania Ema Korbun kompleton podiumin. Në këtë garë, por në bateritë eliminatore, konkurroi edhe Luiza Gega, e cila ishte e dëmtuar dhe nuk arriti të kualifikohet për në finale.
Rezultatet e ditës së tretë të garave të atletikës
Kërcim Trehapësh – Femra
1) Katerine Ibarguen (Kolumbi) 15.17 m
2) Julimar Rojas (Venezuelë) 14.98 m
3) Olga Ripakova (Kazakistan) 14.74 m
3,000 metra me pengesa – Femra
1) Ruth Xhebet (Bahrein) 8’59”75
2) Hivin Kijeng Jepkemoi (Kenia) 9’07”12
3) Ema Korburn (SHBA) 9’07”63
Hedhje çekiçi – Femra
1) Anita Vlodarczik (Poloni) 82.29 m
2) Venxiu Zhang (Kinë) 76.75 m
3) Sofie Hitshon (Britani e Madhe) 74.54 m
