I ndjerë keq, pa asnjë fjalë, trajneri i Luiza Gegës, Taulant Stërmasi, e ka pasur të vështirë të shpjegojë situatën, ndërsa thotë fillimisht se tashmë duhet një kohë e gjatë rehabilitimi për të menduar garat e ardhshme. “Jam vërtetë i shokuar, – thotë Stërmasi nga Rio. – Prisja që të kishim probleme me tendinin, por jo të ishte kaq shumë bllokuese. Përveç problemit që pati, Luizës ju bllokua këmba që nga pulpa deri në kofshë pas xhiros së parë dhe deri në fund e zuri ngërçi tek katër gishtat e këmbës së dëmtuar. Edhe 30 minuta pas garës nuk liroheshin.”

“Ajo e përfundoi garën e freskët pa dhënë asgjë nga mundësitë që ka ajo në këtë disiplinë”, – ka zbuluar ai. Duke vijuar më tej, Stërmasi vë alarmin sepse, sipas tij, situata e dëmtimit është shqetësuese. “Më duhet mjek sportiv specialist gjithë kohën me vete, sepse në vazhdim nuk dua të kem surpriza të pakëndshme si kësaj radhe. Jemi lodhur kaq shumë që të mos na shkonte gara kaq keq. Mirëpo ndonjëherë edhe Zoti nuk është me ne, por vetëm ne mund të jemi kaq të pakujdesshëm me rehabilitimin e sportistit dhe këtu hyj dhe unë e mbaj përgjegjësitë e mia”.

E më tej akoma, Stërmasi për të mos e lodhur gojën nuk e ka kërkuar specialistin me vete. “Sepse nga që na ka munguar gjithnjë mjeku sportiv duket si absurde t’ia kërkosh organeve sportive shqiptare, pasi e dinim mirë se nuk kishim mundësi të na e sjellin, – ka pohuar ai. – Për dy arsye, e para s’ka specialist sportiv aktiv që është marrë me sportin vitet e fundit dhe se askush nuk bën sakrificat që bëjmë ne duke lënë familjet tona 9 muaj të vitit për pagesa qesharake, ose pa to fare”. E ndërkohë janë duke u kërkuar mundësi rehabilitimi jashtë vendit.

“Po konsultohemi me mjekët këtu. Do të bëjmë një rezonancë e do të fillojmë menjëherë fizioterapinë. Sezoni u mbyll fatkeqësisht për këtë vit. Do të mundohemi ta rehabilitojmë këmbën sa më shpejt të jetë e mundur, qoftë dhe jashtë vendit nëse duhet”, – ka përfunduar trajneri i Luiza Gegës, Taulant Stërmasi.