Peshëngritja shqiptare, nëpërmjet Sekretarit të Përgjithshëm të Federatës, Agron Haxhihyseni, ka rikonfirmuar dhe një herë delegacionin e shtangës kuqezi në Lojërat Olimpike “Rio de Zhaneiro 2016”. Një delegacion që, sipas Haxhihysenit, kryesohet nga presidenti i Federatës Shqiptare të Peshëngritjes, Elez Gjoza.
“Sportistë janë Briken Calja dhe Evangjeli Veli e trajner Leonard Toska”, thotë Haxhihyseni për “Sport Ekspres”, ndërsa kështu shtangistja e peshës 53 kg, e cila po shkon në këto Lojëra me ftesë, rezulton pa trajner dhe do të udhëhiqet në garë nga presidenti Gjoza dhe trajneri Toska.
Mirëpo e gjithë kjo situatë ka krijuar kaos dhe në Komitetin Olimpik Kombëtar Shqiptar, sepse sipas presidentit të olimpizmit shqiptar është prerë një biletë vajtje-ardhje në Rio në shumën 3,800 euro, të cilat nëse shkojnë dëm kush i paguan. “Na sollën emrin e Sokol Bishanakut për trajner për Velin, por më pas thanë hiqeni se nuk e donin”, – ka thënë presidenti i KOKSH-it, Viron Bezhani.
“Është turp për ne si delegacion shqiptar që një sportiste ta kemi pa trajner në Rio. Mirëpo kjo është Federata Shqiptare e Peshëngritjes”, – shton me keqardhje Bezhani, ndërsa për herë të parë në historinë e pjesëmarrjes së delegacionit olimpik shqiptar në këto Lojëra një sportiste shkon pa trajner.
Ndonëse në garë, ashtu sikurse ka ndodhur dhe në Kampionatet Botërore dhe Evropiane të Peshëngritjes, presidenti Gjoza dhe një trajner, në këtë rast Leonard Toska, që është për sportistin e tij Briken Calja, do të udhëheqin Velin në garë në peshën 53 kg.
Delegacioni Olimpik Shqiptar në “Rio 2016”:
1) Luiza Gega Atletikë
2) Taulant Stërmasi Trajner
3) Izmir Smajlaj Atletikë
4) Vildan Tufi Trajner
5) Sidni Hoxha Not
6) Nikol Merizaj Not
7) Sadik Mema Trajner
8) Briken Calja Peshëngritje
9) Leonard Toska Trajner
10) Gjergji Ruli Shefi i Misionit
11) Kliton Muço Zyrtar
12) Mel Ostreni Doktor
13) Elez Gjoza Zyrtar/Presidenti i Federatës së Peshëngritjes
14) Evangjeli Veli Peshëngritëse
