Koreanët kanë gjetur kundërshtarin më të dobët të Lojërave Olimpike, Fixhin, dhe kanë realizuar tetë gola. Bollëk golash në ndeshjen Nigeri-Japoni, Etobo shënuesi më i mirë i ndeshjeve të para në grupe. Korea e Jugut mund dhe duhet quajtur skuadra më fenomenale e futbollit të meshkujve në raundin e parë të takimeve në grupe. Jo vetëm sepse ka fiksuar rezultatin më të thellë të ndeshjeve të para, teksa ka realizuar tetë gola në portën e Ishujt Fixhi, por sepse ka shënuar dy gola për një minutë.
Nëse në pjesën e parë Fixhi kanë rezistuar, ndërsa në të 32-ën minutën koreanojugët kanë kaluar në epërsi me anë të Rui Seung-Vosë, në pjesën e dytë porta e tyre është bërë tabelë qitjeje. Pikërisht Kung Shan-Ho do të shënonte golin e dytë në minutën e 62-ën dhe më pas i njëjti lojtar, së bashku dhe me Rui Seung-Vo do të fiksonin në të 63-ën shifrat 4-0. Bëhen të papërmbajtshëm dhe të sapofuturit në fushën e lojës Son Heung-Min, që shënon nga pika e bardhë e 11-metërshi, por dhe Sun Hiuk-Jun.
Dhe në fund Rui Seung-Vo do të fiksonte rezultatin 8-0, që është ndër më të thellët në turnetë olimpik, ndërsa Ishujt Fixhi ishin kundërshtari që s’kishin lidhje me futbollin. E të frymëzuar nga Fixhi-Kore e Jugut, Nigeri-Japoni sjellin bollëk golash. Vlen të përmendet fakti që në 15 minutat e para të ndeshjes janë shënuar katër gola duke u fiksuar barazimi 2-2. Por nuk mbaron këtu. Etobo fikson fitoren e Nigerisë në fundin e pjesës së parë 3-2. Dhe më pas në pjesën e dytë shënon dhe dy gola të tjerë dhe 5-2.
Katër gola për Etobon, që është shënuesi më i mirë i ndeshjeve të para në grupe në futboll. Ndërkohë ndeshja ka pasur momente interesante, sepse Japonia, me anë të Asanos dhe Suzukit, ka ngushtuar në 5-4. Por vetëm kaq. Një ndeshje e fortë është zhvilluar mes Suedisë dhe Kolumbisë. Nuk duhet harruar që Suedia është nënkampione e Evropës për Nën-21-vjeçarët. Kolumbianët kanë kaluar në epërsi me anë të Gutierrez, por në fund të pjesës së parë ka barazuar Ishak.
Mandej kalojnë në epërsi nordikët më anë të Ajdareviçit dhe Pabon me 11-metërsha fikson barazimin 2-2. Kështu kanë përfunduar ndeshjet e para në grup të futbollit, ndërsa Korea e Jugut, me dy gola në një minutë, është kthyer në fenomenin e Lojërave Olimpike “Rio de Zhaneiro 2016”.
Lojërat e 31-ta Olimpike “Rio 2016”
Turneu i Futbollit të Meshkujve
Grupi B
Dje:
Suedi – Kolumbi 2-2
Nigeri – Japoni 5-4
Renditja
Nr. Skuadra N. F. B. H. Gsh-Gp Pikë
- Nigeria 1 1 0 0 5-4 3
- Kolumbia 1 0 1 0 2-2 1
- Suedia 1 0 1 0 2-2 1
- Japonia 1 0 0 1 4-5 0
Grupi C
Dje:
Meksikë – Gjermani 2-2
Fixhi – Kore e Jugut 0-8
Renditja
Nr. Skuadra N. F. B. H. Gsh-Gp Pikë
- Koreja e Jugut 1 1 0 0 8-0 3
- Gjermania 1 0 1 0 2-2 1
- Meksika 1 0 1 0 2-2 1
- Fixhi 1 0 0 1 0-8 0
