ASNN – Pasi ka kurorëzuar Kinën si kampione olimpike në volejbollin e femrave, Olimpiada “Rio 2016” ka kurorëzuar edhe Brazilin si kampion olimpik në volejbollin e meshkujve, në takimin e zhvilluar në ditën e fundit të saj. Përfaqësuesja vendase ka triumfuar në 3 sete ndaj Italisë, në finalen e sjellë për sportdashësit drejtpërdrejt nga Rrjeti i Radio-Televizionit Shqiptar, duke lënë kështu prapa dy zhgënjimet në finalet e dy Olimpiadave të fundit.

Sa afër, po aq larg…! Kështu ka ndodhur të dielën në mbrëmje në finalen e turneut të volejbollit për meshkuj në Olimpiadën e 31-të, ku Italia ka guxuar, por kjo nuk ka mjaftuar ndaj Brazilit vendas. Pavarsisht se i ka nisur mjaft mirë të 3 setet, të dy prej të cilëve kërkuan edhe pikët shtesë, përfaqësuesja “axurre” nuk ka arritur dot t’i prishë festën vendasve, e cila, nga ana e saj, ka lënë kështu prapa dy zhgënjimet në finalet e dy Olimpiadave të fundit.

Brazilianët ishin mundur në mënyrë të pabesueshme nga Rusia në finalen e para 4 vjetëve në Londër, kur shkuan dëm edhe dy mundësi për ta mbyllur ndeshjen e fituar në fund nga rusët. Pësimi siç duket ishte bërë mësim, pasi brazilianët e kanë mbyllur gjithçka në 3 sete ndaj Italisë, duke mos i lënë asgjë në dorë rastësisë. Pas një fillimi të mirë të Italisë, Brazili përmbys shifrat në mesin e setit të parë, duke vijuar të ruajë kryesimin deri në fund e duke e fituar atë me shifrat 25-22.

E njëjta tablo është edhe në setin e dytë, ku, përtej përpjekjeve më të mëdha të Italisë, që e ka çuar lojën 3 herë në pikët shtesë, është Brazili që triumfon 28-26 pas 37 minutash. Italia përpiqet edhe në setin e tretë, por, të nxitur edhe nga tifozeria vendase, Brazili e fiton edhe me shifrat 26-24 dhe gjithë ndeshjen me rezultatin 3-0. Në duelin për vendin e 3-të dhe të 4-t, Shtetet e Bashkuara të Amerikës përmbysën humbjen e dy seteve të para, duke e mundur Rusinë me shifrat 3-2 e duke marrë medaljen e bronztë.

ITA – BRA      0-3

Setet   Total   1                      2                      3

Italy     0          22                    26                    24

Brazil  3          25                    28                    26

29 min            37 min            31 min
 SHBA-RUS 3-2

Setet   Total   1                      2                      3                      4                        5

SHBA 3          23                    21                    25                    25                    15

Rusi    2          25                    25                    19                    19                    13

27 min            27 min            22 min            21 min            20 min