ASNN – Pas ndërprerjes për shkak të ndeshjeve të Kombëtares kuqezi në kuadër të Ligës së Kombeve, në fundjavë rikthehet Kampionati Kombëtar i Futbollit me ndeshjet e radhës në të dy nivelet e tij. Në nivelin më të lartë, Kategorinë Superiore, luhet java e 4-t dhe ndeshjet janë shtrirë në 3 ditë.

Kështu, të shtunën pasdite gjithçka nis në ora 15:45, me takimin Kamza-Kastrioti, ndërsa në mbrëmje, duke nisur nga ora 18:45, luhet dueli midis Teutës dhe Kukësit. Dy takimet e tjera luhen të dielën dhe, duke nisur nga ora 15:45, në Laç zhvillohet takimi midis skuadrës vendase dhe Partizanit.

Të dy ekipet që i ndan vetëm një pikë nga njëra-tjetra në renditje. Kurse në mbrëmje, duke nisur nga ora 18:45, në kryeqytet luhet takimi midis Tiranës dhe Luftëtarit, dy skuadrave që mbyllin fundit e renditjes dhe bardheblutë janë ende në kërkim të fitores së parë.

Ndërsa gjirokastritët nuk kanë marrë as edhe një pikë të vetme në 3 javët e para. Java e 4-ët mbyllet me duelin e kreut, midis Flamurtarit dhe Skënderbeut, që do të luhet të hënën në mbrëmje, duke nisur nga ora 19:45, në Vlorë. Vendasit dhe korçarët ndajnë kreun e renditjes, me nga 7 pikë secila dhe ende nuk e njohin humbjen.

Kategoria Superiore

Java e 4-t:

Të shtunën, 15/09/2018:

Kamza – Kastrioti                  15:45

Teuta – Kukësi                      18:45

Të dielën, 16/09/2018:

Laçi – Partizani                     15:45

Tirana – Luftëtari                   18:45

Të hënën, 17/09/2018:

Flamurtari – Skënderbeu    19:45