ASNN – Duket koha ka ardhur dhe një tjetër kampionat futbolli rikthehet këtë muaj në kontinentin e vjetër. Bëhet fjalë për Hungarinë, që ka dhënë miratimin që të rinisin ndeshjet e futbollit. Gjithçka është zyrtare dhe me 23 maj do të luhen gjysmëfinalet e Kupës së Hungarisë.
Një javë më pas, më 30 maj, rinis kampionati. Sigurisht që ndeshjet do të zhvillohen pa praninë e publikut, ndërkohë që të gjithë do të ndjekin edhe një protokoll shëndetësor që të mos ketë njerëz të infektuar. Më parë, edhe Republika Çeke ka marrë vendimin për ta kthyer futbollin dhe atje nis kampionati më 29 maj.
Polonia dhe Portugalia gjithashtu kanë konfirmuar datat e rikthimit në fushën e blertë. Së shpejti pritet edhe zyrtarizimi i datës së kthimit edhe nga Danimarka, kurse në Gjermani pritet që miratimi të jepet të mërkurën. Franca e ka mbyllur me vendim qeverie kampionatin, ndërsa Belgjika dhe Holanda janë në pikëpyetje.
