ASNN – Kombëtarja e Shqipërisë është ngjitur me dy pozicione në renditjene përgjithshëm të FIFA-s. Në renditjen e përditësuar për muajin shkurt, përfaqësuesja kuqezi mban vendin e 61-të. Shqipëria humbi shumë vende në renditjen botërore gjatë muajit janar, për shkak të impenjimit të skuadrave afrikane dhe aziatike në kampionatet përkatëse të këtyre kontinenteve.
Shqipëria ka mundur të rikuperojë dy vende në renditjen e fundit të FIFA-s, të publikuar këtë të enjte, duke u ngjitur në vendin e 61-të në botë me 557 pikë, nga 548 që ka pasur një muaj më parë. Sa i përket Armenisë, kundërshtarit të radhës në eliminatoret e Euro 2016, kjo skuadër pozicionohet në vendin e 79-të. Nuk ka ndryshime sa i përket kryesuesëve. Gjermania mban vendin e parë, e ndjekur nga Argjentina dhe Kolumbia.
Ajo që të bie më shumë në sy në renditjen e fundit është rikthimi i Italisë në 10 ekipet më të mira, por mungesa ndër to e Spanjës. Në renditjen e muajit shkurt, Italia gjendej në vendin e 12-të, pas Spanjës dhe Zvicrës, ndërsa tashmë për herë të parë që prej qershorit 2014 ka kapur vendin e 10-të. Pas shumë viteve dominim total, si në futbollin europian, por edhe në futbollin botëror, spanjollët kanë zbritur në vendin e 11-të.
Kujtojmë që Spanja ka fituar Botërorin e vitit 2010 dhe Evropianët e viteve 2008 dhe 2012. Një periudhë e re duket se do të nisë për skuadrën iberike, edhe pse do të ketë sërish Del Bosken në krye të stolit, një prej trajnerëve më të shquar spanjollë, por që në Brazil nuk shkoi më shumë sesa ndeshjet e fazës me grupe. Ky ndryshim vendesh është i vetmi ndër 10 të parët.
Kjo pasi Gjermania vazhdon të mbajë vendin e parë, e ndjekur nga Argjentina dhe Kolumbia. Më pas vijnë Belgjika, Holanda, Brazili, Portugalia, Franca dhe Uruguaji. Renditja e ardhshme e FIFA-s do të publikohet më 9 prill, një renditje që do të ketë përfshirë edhe rezultatet e ndeshjeve eliminatore të këtij fundmuaji, ku vlen të përmendet se Shqipëria do të presë Armeninë në “Elbasan Arena”, më 29 mars 2015.
